La-taliyihii hore ee amniga qaranka ee madaxweyne Farmaajo, iyo agaasimihii hore ee NISA, Fahad Yaasiin ayaa ka hadlay khilaafka ka dhex aloosan dowladda federaalka Soomaaliya iyo maamulka Jubbaland.
Fahad ayaa sheegay khilaafka Jubbaland iyo dowladda dhexe uu yahay imtixaankii ugu halista badnaa ee taabanaya mustaqbalka ra’iisul wasaare Xamza Cabdi Bare.
Agaasimihii hore ee NISA ayaa waxa uu soo bandhigay saddex qodob oo uu ku sheegay “xalka ra’iisul wasaare Xamza iyo Jubbaland” taas oo marka dhan walba laga joogsado ay tahay inuu qaado Xamza.
Hoos ka aqriso qoraalka Fahad
Raysal Wasaare Xamza iyo xalka Jubaland
Khilaafka siyaasadeed ee dhex taalla Jubaland iyo Dowlada Federaalka waa imtixaankii ugu halista badnaa ee taabanaya mustaqbalka Raysul Wasaare Mudane Xamse Cabdi Bare.
Dhan walba oo laga joogsado Mudane Xamse waxaa u furan tubaha soo socda;
1. In uu Axmed Madoobe soo qanciyo, kuna soo celiyo madasha, sidaasna uu ku damiyo xiisada taagan.
2: In Raysal Wasaare Xamse uu muujiyo awooddiisa, siyaasad ahaan iyo degaan ahaan labadaba, uuna caddeeyo in Jubaland aysan ahayn xarun siyaasadeed oo Axmed Madoobe kaligiis u furan.
3. In uu ku dhawaaqo in uusan haysanin awood dowladeed oo uu wax ku maquuniyo ama galaangal qaraabannimo oo uu kursiga kusii haysto, duruuftana ay ku kaliftay inuu noqdo nabadoon deeqsi ah, sidaasna uu ku sadaqeeyo kursigiisa
