Wasiirka Gaashaandhigga Soomaaliya, Cabdulqaadir Maxamed Nuur (Jaamac) ayaa si faah-faahsan uga hadlay howlgallada xoreynta ee dalka ka socda, isla markaana ay iska kaashanayaan ciidamada dowladda iyo kuwa deegaanka.
Jaamac oo khudbad ka jeediyay munaasabad xarrig jarayay dhismaha cusub ee xarunta Ciidanka Dhulka ee Xoogga Dalka ayaa sheegay in guullo waa wayn laga gaaray dagaalka ka dhanka ah kooxda Al-Shabaab, welina uu sii socdo gulufka ka dhanka ah kooxdaasi.
Sidoo kale wuxuu tilmaamay in howlgalladu ay sii socon doonaan, isaga oo sheegay in waqti dhow uu jab culus oo lama filaan ah ku dhici doono Khawaarijta.
Wasiirka Gaashaandhigga ayaa sidoo kale digniin u diray dadka rayidka ah ee jooga deegaannada Al-Shabaab, wxuuuna ugu baaqay inay ka fogaadaan aaggooda.
“Waqti dhow wax weyn oo aadan filanayn ayaa ku dhici doonna Al-Shabaab ee shacabkow ka fogaada” ayuu yiri Wasiir Cabdulqaadir Maxamed Nuur (Jaamac).
Duqeymaha ayuu sidoo kale tilmaamay inay sii socon doonaan, ujeedkana waxa uu tilmaamay inuu yahay in lagu naafeeyo Khawaarijta.
Koonfurta iyo bartamaha Soomaaliya ayaa waxaa weli ka socda dagaallo ka dhan ah Shabaab, waxaana barbar socda duqeymo diyaaradeed oo lagu taageerayo ciidamada.
