Agaasimaha Sirdoonka Qaranka ee dalka Turkiga Ibrahim Kalin ayaa maanta booqasho ku yimid magaalada Muqdisho. Waxaa la filayaa inuu la kulmo Madaxda dalka iyo Agaasimaha Sirdoonka Soomaaliya C/llaahi Maxamed Cali Sanbaloolshe.
Safarkiisa ayaa wuxuu daaran yahay iskaashiga iyo xoojinta xiriirka labada Sirdoon ee Soomaaliya iyo Turkiga, iyadoo ay qeyb ka tahay la dagaalanka Argagixisada, oo uu Turkiga si weyn ugu taageerayo dowladda Soomaaliya.
Booqashada ee gaasimaha Sirdoonka dalka Turkiga Ibrahim Kalin uu maanta Muqdisho ku yimid waxay caddeeyneeysaa inuu dib u billowday xiriirkii iyo wada shaqeeyntii ay sirdoonnada caalamka la lahaayeen dalkeenna oo go’naa labadii sano ee la soo dhaafay.
Turkigu waxay xiriirkii wada shaqeeyn ee sirdoonkeenna joojiyeen markii uu dhacay shirqoolkii sirdoonku ku dileen Jeneral Qaroole kadibna isla ninkii dilay uu qaatay dhammaan qorshihii dagaalka ee diyaaradaha dagaal ee Beyraqdaar oo turkigu leeyahay kadibna uu Alshabaab dib ula midoobay.
