Booliiska Australia ayaa sheegay in ay toogteen nin weerar toorrey loo adeegsaday ku qaaday lix qof oo ku sugnaa suuq weyn oo ku yaalla magaalada Sydney. Ninka ayaa Sabtida maanta ah lagu dilay xeebta Bondi, sida ay boolisku sheegeen, iyadoo weerarkaasi uu sababay in boqolaal qof ay goobta ka cararaan.
Ninka weerarka qaaday ayaa waxaa toogtay askari booliis ah kadib markii uu weeraray dad wax ka iibsanayay xarunta mashquulka badan ee Westfield Bondi, sida ay booliisku ku sheegeen qoraal ay soo saareen.
Shan ka mid ah lixda qof ee la dilay ayaa ahaa dumar, halka siddeed qof oo uu ku jiro ilmo sagaal bilood jir ahna loo qaaday cusbitaalka iyaga oo qaba dhaawacyo ka soo gaaray weerarka mindida ama tooreyda loo adeegsaday, sida ay shir jaraa’id ka sheegtay Taliyaha Bilayska New South Wales Karen Webb.
Webb ayaa sheegtay in booliisku aysan hadda wali aaminsanayn in weerarku uu la xiriiro fal argagixisonimo.
Ra’iisul wasaaraha Australia Anthony Albanese ayaa sheegay in aysan jirin wax calaamad ah oo muujinaya ujeedka uu ninkan u qaaday weerarka.
“Waa fal rabshadeed aad u xun oo si aan kala sooc lahayn loogu bar-tilmaameedsaday dad aan waxba galabsan oo adeeganayay,” ayuu ka sheegay shir jaraa’id.
“Caawa quluubta dhammaan dadka Australiyaanka ah waxa ay la jiraan dhibanayaasha ficilladan xun-xun.”
Australia waxa ay leedahay sharciyada ugu adag adduunka ee dhinaca hubka iyo middiyaha, waxaana dhif iyo naadir ka ah weerarada la midka ah kan maanta dalkaasi ka dhacay.
