Arooska Hibo Siciid iyo Cabdullaahi Cabdiwali ayaa hadal hayn ka dhaliyay baraha bulshada ee Soomaalida, markii dhallinyaradaan ku koray dhaqanka magaalada ay go’aansadeen in arooskoodu ka dhaco miyiga gobolka Galgaduud.
Todobaadkii hore, ayay baadiyaha Degmada Cabudwaaq ee gobolka Galgaduud ku aqal galeen, iyada oo ay si wayn u baaheen sawirada arooska.
Marka laga yimaado in ay baadiye ku dhigteen arooska, ayaa waxa ugu wayn ee dad badan ay xiiso ugu leheed ka hadalka arooskaan ayaa ah in caruusadd -Hibo Saciid – ay ka timid qurbaha, gaar ahaan waddanka Ingiriiska.
Sidee gabar da’yar oo ku kortay dal ku yalla galbeedka ay u door biday in ay ku aqal gasho baadiye ku yaalla Soomaaliya, aya ahayd waxa ugu wayn ee dad badan ka dhex guuxayay.
Jawaabta Hibo ayaa ah in ay waligeed ku hamin jirtay in ay ku aqal gasho baadiyaha Soomaaliya.
“Anigu dhaqanka iyo miyiga waan jecelaha,” ayay tiri hibo oo la hadashay BBC da. “Mar aan dalka kusoo laabtay sanadkii 2019-kii ayaan baadiye badan tagay xilligaas ayaan go,aansaday in aan ku arooso”.
Inkasta oo farqi weyn uu u dhaxeeyo qaabka loo dhigo aroosyada miyiga iyo kuwa magaalada, gaar ahaan halka ay ka timid Hibo Saciid ee ah dalka Ingiriiska, ayaa Hibo waxay sheegtay in ay dooneysay in arooskeedu u dhaco sidii uu yahay dhaqanka asalka ah ee arooska reer miyiga Soomaalida.
Waxaa loo dhisay aqal Soomaali, iyaga oo goob banaan balse si shaaximan loo goglay casuumaad ugu sameeyay qaraabadooda iyo dadkii kale ee martida u ahaa. Waxaa loo soo galbiyay aqalkooda iyaga oo loo qaaday heesihii dhaqanka Soomaalida ee galbiska aroosyada.
“Farxad ayay ii ahyed in arooskayga uu ahaa mid ka duwan aroosyada kale, waayo waxaa uu u dhacay sidii ay u dhigan jireen awoowayaasheen iyo dadkii hore ee Soomaaliyeed, anigu aan jecelaa” ayay hadalkeeda raacisay Hibo.
Caruuska – Cabdullahi Cabdiwali, isaga waxa uu ku barbaaray Soomaaliya, balse waxa uu ku soo koray qudhiisu dhaqanka magaalada. Waxa uu sheegay in qudhiisu muddo badan uu ku haminayay in arooskiisu ka dhaco goob miyi ah.
“Dhaqanka dadka Soomaaliyeed asalkiisa waxaa uu ahaa miyi, howshaan muddo dheer ayaan ku rejo weynaa – in arooskeena uu halkaasi ka dhaco,” ayuu BBC da u sheegay Cabdullahi Cabdiwali.
“Dhaqanka miyiga ayaa sii yaraanaya”
Waxaa uu sheegay in markii ay xaaskiisa u soo jeedisay in arooskoodu uu ka dhaco baadiye uu aad u soo dhaweeyay, maadama dhaqankii iyo hidihii ay dadka Soomaaliyeed caanka ku ahyeen uu hadda aad yaraaday ayna rabeen in fariin diraan.
“Fariin ayay ahyed in aan arooskeena baadiye ka dhigno waayo dhaqankii iyo hidihii Soomaliyeed ee caanka ahaa aad ayuu u sii yaraanayaa “ ayuu hadalkiisa sii raaciyay Cabdullahi .
Arooska ayaa waxaa si weyn uga faceliyay buslahada, waxaan Hibo ay BBC-da u sheegtay in dadka iyo saaxibadeeda ay la yaabeen markii ay go’aanka qaadaneysay.
“Markii hore dadka sheeko waalan ayay u arkayeen, ‘waxaa ay igu lahaayeen baadiye maxaa ka doonaysaa?’, laakin markii aan go,aankayga ku adkaystay waxaa uu noqday wax cajiib ah oo la wada sugayo”.
Dhisamaha aqal Soomaaliga iyo colaadda qabaa’ilka ee ka jirta deeganka ayay tilmaantay in ay ahyen caqabadihii uu lahaa arooska.
“Waxaa jiro colaado badan oo sokeeye, marka caqabadii ugu badnayd waxaa ay ahyeed ammaanka dadka ka qeyb galayay oo madax ay xataa ku jirtay” ayay BBC u sheegtay Hibo.
“Markii maalinkii meherka la dhigo habeenkii meeshii xoogaa waa colaada lama ciyaari karo oo ammaanka ayaa loo baqayaa “ ayay hadalkeeda sii raacisay Hibo.
Sidee ayuu ku biloowday xariirka Jaceyl ee Hibo iyo Cabdullahi ?
Hibo saciid Cabdi iyo Saygeeda Cabdullahi Cabdiwali, ayaa sheegay in ay isku barteen Magaalada Caabudwaaq sanadkii 2019-kii xilligaasi oo Hibo dalka dib ugu soo laabtay, Cabdullahina uu booqasho ku imaaday Caabduwaaq.
Muddo Afar sano ah oo ay soo wadeen xariir jecel kadib, ayay sheegeen in ugu dambeyntii ay ku guuleysteen in ay hadda ka miro dhaliyaan xariirkoodii jaceyl.
Inkasta oo ay aad u kala fogaayeen haddana waxay sheegeen in xiriirkoodu uu ahaa mid aad u sareeya.
“ Ma sahlana jecelka iyo xariirka gabar lagu bixiyay madal geed hoostiisa ah oo guurti joogtay waa mid culus” ayuu yiri Cabdullahi Cabdiwali.
