Malaayiin muslimiin ah ayaa sannadkan gudanaya waajibaadka xajka oo Alle uu ku waajibiyey ciddii awoodda.
Muslimiintaas waxaa ka mid ah cayaartoy magac leh oo ka cayaara horyaallada kubadda cagta e adduunka ugu caansan.
Sannad kastana waxaa xajka tagi jiray cayaartoy ay markaa ugu horreyso iyo kuwo hore u xajin jiray.
Qormadan waxaan ku eegaynaa cayaartoydaas muslimiinta ah ee u cayaara naadiyada waaweyn ee xajka gudanaya, iyo qaar hore u gutay Xajka.
Karim Benzema
Karim Musfata Benzema waa weeraryahan u safan jiray xulka qaramka Faransiiska iyo kooxda Real Madrid.
Wuxuu hadda ku biiray kooxda Al-Itixaad ee Sacuudiga. Waa 35 jir ku dhashay Lyon, wuxuuna ku guulaystay abaal marinta Ballon D’or.
Benzema dhowr goor oo hore ayuu xajiyey, waxaana aad loogu xasuustaa in cayaaraha uu safan jiray isagoo sooman xilliyada Ramadaanka.
Mesut Ozil
Ozil waa laacib u dhashay Jarmalka, laakinse waalidkiis ay ka soo jeedaan Turkiga.
Wuxuu u saftay kooxo waaweyn oo ay ka mid yihiin Real Madrid iyo Arsenal, wuxuuna ka cayaaraa Khadka dhexe ee dhinaca weerarka.
Kooxaha kale ee uu u soo cayaaray waxaa aka mid ah Schalke 04, Werder Bremen, Fenerbahce iyo Istanbul Basaksehir oo uu hadda ka tirsan yahay
Hakan Calhanoglu
Calhanoglu waa cayaartoy Khadka dhexe ka cayaara oo ku dhashay dalka Jarmalka, laakinse ay waalidkiis ka soo jeedaan Turkiga.
Waa 29 jir, wuxuuna hadda u saftaa naadiga Inter Milan, mana aha markii ugu horreysay ee uu cibaado u tago dalka Sacuudiga.
Hore wuxuu ugu soo cayaaray Karlsruher SC, Hamburg, Bayer Leverkusen, iyo AC Milan.
Paul Pogba
Pogba waa nin hore u cibaadeysan jiray, dhowr goorna dhulka barakaysan u tegey inuu cibaadeysto.
Wuxuu u cayaaraa naadiga xulka qaranka faransiiska laakinse waalidkiis waxay ka soo jeedaan dalka Guinea.
Waa 30 jir, wuxuuna hadda ka tirsan yahay naadiga Juventus. Hore wuxuu ugu soo cayaaray kooxda Manchester United.
N’golo Kante
Kante waa 32 ku dhashay magaalada Paris, kana tirsan xulka qaranka ee Faransiiska. Waalidkiis waxay ka soo jeedaan dalka Mali.
Wuxuu 1da bisha Luulyo ku biiri doonaa kooxda Al Itixaad ee dalka Sacuudiga, isagoo ka soo wareegaya kooxda Chelsea.
Kante wuxuu hore ugu soo cayaaray kooxda Leicester city, ka hor intii uusan ku soo biirin Chelsea 2016.
Cayaartoyda hore u tegey Maka iyo Madiina si ay u soo xajiyaan ama u soo cibaadeystaan waxaa ka mi dah Nicolas Anelka, Demba Ba, Emmanuel Adebayor iyo Mike Tyson .
