Inta la xaqiijiyay 10 ka tirsan Al-Shabaab oo ay ku jiraan saraakiil ayaa lagu dilay howlgal ciidanka Sirdoonka iyo Nabad Sugidda Qaranka iyo Saaxiibada Caalamiga ah ka sameeyeen Degaanka Buurweyn oo 23-km Waqooyi Galbeed ka xiga degmada Jalalaqsi sida lagu sheegay War-saxaafadeed ka soo baxay dowlada Soomaaliya.
“Howlgalkaan ayaa lagu beegsaday Horjoogayaal ay ku raad joogeen Sirdoonka Soomaaliya kuwaas oo saarnaa Gaari uu leeyahay Horjooge Ibnu Bashiir oo ah horjoogaha maleeshiyada ay khawaarijta ugu yeeraan Xisbada ee gobalka Hiiraan, wuxuuna xilligaasi taagnaa gaariga meel fariisin u ahayd maleeshiyaad badan oo khawaarij ah” ayaa lagu yiri War-saxaafadeedka.
Sidoo kale War-saxaafadeedka ayaa lagu sheegay magacyada saraakiisha lagu dilay howlgalkaas.
“Waxaa howlgalkaan lagu dilay Horjoogihii Guud ee Caafimaadka maleeshiyada ay ugu yeeraan xisbada Gobalka Hiiraan oo lagu magacaabi jiray Muxsin iyo Horjooge Anas oo ahaa Horjoogihii isla maleeshiyadaas u qaabilsanaa aagga Jalalaqsi, sidoo kale waxaa howlgalkaan lagu dilay maleeshiyaad kale oo saarnaa gaariga iyo kuwa joogay halka uu howlgalka ka dhacay” ayaa lagu yiri War-saxaafadeedka.
HOOS KA AKHRISO WAR-SAXAAFADEEDKA
