Dowladda federaalka Soomaaliya ayaa awood dheeraad ah siisay ciidamada ka howl-gala bar-kontaroolada laga ilaaliyo magaalada Muqdisho ee caasimada dalka.
Afhayeenka Booliska Soomaaliya Sadiiq Doodishe oo maanta la hadlay warbaahinta ayaa sheegay in madaxda wata ilaalada iyo gaadiidka gaashaman ay tahay inay u hogaansamaan awaamiirta ciidamadaas, islamarkaana ay ku gacan siiyaan gudashada waajibaadkooda shaqo.
“Ciidankaas faritaanada noocaas haysta ayaa waxa dhacda in dad wata gaadiid iyo ciidan ay mararka qaar isku-dayaan si xoog ah ku jiiraan kontoroolada, sidaas daraadeed waxaan uga digeyna dadka wata ciidamada waxay doonaan ha ahaadeen meesha ay doonaan ha ka shaqeeyaan in ay u dhago nuglaadan ciidamada jooga baraha hubinta gaadiidka.”
Awooda dheeraadka ah ee la siiyay ciidamada ku sugan bar-kontoraalada magaalada Muqdisho ayaa looga dan leeyahay si wax looga qabto amni darada caasimada, maadama ay jiraan tuhuno la xiriira in saraakiil ka tirsan dowlada ay argagixisada ku gacan siiyaan falalka amni darro, gaar ahaan soo gelinta qaraxyada.
