Maxkamada Solna ayaa maanta xukun ku riday nin 27 jir ah oo lagu soo eedeeyay kufsi iyo faraxumayn uu u geystay 10 haween ah isagoo ka shaqaynayay Taksiile.
Eedeysanaha ayaa lagu xukumay afar sano iyo sagaal bilood oo xarig ah, waxaana laga musaafurinayaa dalka Sweden markii uu dhameystay xukunkiisa.
Ninkan ayaa lagu helay labo dambi oo isugu jira kufsi, saddex isku day kufsi, labo faraxumeyn iyo xarig sharci darro ah. Waxa lagu waayay laba isku day kufsi.
Sida laga soo xigtay xafiiska xeer ilaalinta , dambiilaha ayaa adeegsaday rabshado aad u daran inta badan, waxaana uu isku dayay inuu ku caburiyo mid ka mid ah dhibbanayaasha maro.
Dembiyada ayaa dhacay intii u dhaxaysay 2021 iyo 2022 waxayna ka dhaceen dhammaan Stockholm.
Haweeney da’yar oo lagu magacaabo Matilda ayaa ahayd dhibbanihii ugu horreeyay ee ninkaas bishii Ogosto ee sannadkii hore. Dabadeed, lixdii bilood ee xigtay, wuxuu faraxumeeyay dhowr dumar ah oo ku fadhiya kursiga dambe ee baabuurkiisa.
“Markii aan maqlay tirada haweenka la kufsaday, waan naxay,” Matilda ayaa tiri. Sida laga soo xigtay Aftonbladet.
Booliiska ayaa ninkan xiray lix bilood kadib markii uu galay dambigiisii ugu horeeyay. Kadib markii la xiray, DNA-da ayaa soo bandhigtay kufsiyo badan oo la soo bandhigay.
Eedeysanaha ayaa diiday inuu wax dambi ah galay, isagoo u sheegay maxkamadda, “Aniga ma ihi dembiilaha. Waxba maan samayn, waxaan ahay qof aan waxba galabsan.”
Xigasho : www.svt.se
