Dowladda Soomaaliya ayaa faah faahisay howlgal culus oo ka dhacay gobolka Bari ee maamulka Puntland, kaasoo lagu laayay xubno Shabaab ah
“In ka badan 20 Khawaarij ah oo ay ku jiraan saddex horjooge ayaa lagu laayay tiro intaasi ka badanna waa lagu dhaawacay hawlgal ay iska kaashadeen Ciidanka Qaranka iyo saaxiibada caalamka, kaasi oo ka dhacay buuraha Calmadow ee deegaannada Puntland” ayaa lagu yiri qoraalka.
Hawlgalka ayaa lagu bar-tilmaameedsaday xero ay maleeshiyaadka Shabaab isku aruursanayeen taas oo ku taalla buuraha Calmadow, waxaana halkaasi lagu jabiyay dhagartii ay u maleegayeen shacabka ku nool deegaannada Puntland.
Majirto ilo ka madax banaan dowladda oo xaqiinin kara sheegashadan, iyadoo dhinaca kale Shabaabku aaney ka hadlin jabkan dowladda sheegtay iney gaarsiisay.
