Magaalada Muqdisho waxaa haatan ka socda kulan xasaasi ah oo ay xarunta Villa Hargeysa ku leeyihiin xildhibaannada Golaha Shacabka, kaas oo looga doodayo arrimaha siyaasadda iyo sidoo kale go’aannada masiiriga ah ee dalka.
Ugu horreyn waxaa kulanka ka hadlay Sheekh Aadan Madoobe oo faahfaahin dheeraad ah ka bixiyay ejendaha kulanka maanta oo ka duwan kuwii hore.
“Ajendaha waa ka doodista arrimaha siyaasadda iyo go’aannada masiiriga ah walaalayaal waxaa loola jeedaa maadaama doodda dastuurka ay furan tahay in sida uu ku imaan karo wax ka beddelkiisa laga wada watasho qaabkii loo jiheyn lahaa” ayuu yiri guddoomiyuhu.
“Ujeedada waxa ay tahay, maadaama waqti xasaasi ah lagu jiro in barnaamijka wixii waajibaadkeenna ah aan u gudano sida uu na faraayo dastuurka” ayuu yiri Aadan.
Guddoomiyaha ayaa ugu baaqay xildhibaannada ay si wanaagsan uga doodaan qodobadan xasaasiga ah, maadaam lagu jiro xilli adag, loona baahan yahay dhameystirka dastuurka.
Intaas kadib waxaa bilaabatay doodda xildhibaannada oo si weyn ugu kala aragti duwan ajendaha kulanka.
“Ajendaha waan wada aragnay waa arrimaha siyaasadda iyo go’aamada masiiriga ah ee dalka maan garanin, haddii ay doodda ku saabsaneyso dastuurka ajendaha halaga dhigo arrimaha wax ka beddelka dastuurka” ayuu yiri xildhibaan Mahdi Maxamed Guuleed.
Si kastaba, bishii May ee sanadkii hore ayay aheyd markii Golaha Wadatashiga Qaranka ku heshiiyeen in laga guuro nidaamka hadda jira, ayada oo meesha laga saarayo xilka ra’iisul wasaaraha, si ay Soomaaliya markii ugu horreysay u yeelato madaxweyne iyo ku-xigeen.
