Ciidamada xoogga dalka Soomaaliyeed, gaar ahaan guutada 8-aad qeybta 60-aad ayaa howlgal qorsheysan oo lagu dilay xubno ka tirsan kooxda Al-shabaab ka fuliyay deegaanka Deynuunaay ee gobolka Baay.

Saraakiisha hoggaamineysay Howlgalka ayaa warbaahinta Qaranka u xaqiijiyay in ciidamadu ay howlgalka ku dileen ilaa 7 xubnood oo ka tirsan kooxda Al-shabaab.

Saraakiishu waxay sidoo kale sheegeen in howlgalkaan uu qeyb ka ahaa howlgalada ka dhanka ah kooxda Al-shabaab ee ku sugan deegaanada gobolada Baay iyo Bakool.

Dhinaca kale ciidamada xoogga dalka, gaar ahaan kuwa sida gaarka ah u tababaran ee Kumaandooska Danab ayaa saacadihii lasoo dhaafay weerar qorshaysan oo lagu dilay xubno ka tirsan Al-shabaab ka fuliyay deegaanka Sumadaale oo ka tirsan gobolka Shabeellaha Dhexe.

War qoraal oo kasoo baxay dowladda ayaa lagu sheegay in howlgalka lagu beegsaday goob ay shir ku lahayeen horjoogayaal iyo maleeshiyaad ka tirsan kooxda Al-shabaab.

Warka ka soo baxay dowladda laguma shaacin tirada rasmiga ah ee looga dilay Al-shabaab weerarka ciidanka Danab Kumaandooska Danab ka fuliyeen deegaanka Sumadaale.

Maalmahii ugu dambeeyay deegaano badan oo ka tirsan gobolka Shabeellaha Dhexe, waxaa si xoog leh uga socday dagaalo iyo duqeymo khasaare xoogan lagu gaarsiiyay kooxda Al-shabaab.