Xildhibaan Cabdiraxmaan Cabdishakuur Warsame ayaa noqday xildhibaankii ugu horreeyay ee ku dhawaaqay inuu mushaarkiisa u jarayo ciidamada Puntland, oo haatan dagaal adag kula jira kooxda argagixisada ah ee Daacish.
Xildhibaan Warsame ayaa xildhibaannada labada gole ee baarlamaanka Soomaaliya ugu baaqay inay gacan ka geystaan taakulada ciidanka Puntland ee dagaalka kula jira Daacish, xilli uu maamulka Puntland sameeyay sanduuq lagu garab istaagayo ciidanka.
“Bil mushaarkayga ah ayaan ku deeqay, waxaanan ku dhiirrigelinayaa labada Gole ee Baarlamaanka in ay gacan ka geystaan taakuleynta naftood hurayaasha difaaca dalkeena iyo diinteena u halgamaya,” ayuu yiri Xildhibaan Warsame.
Waxa uu intaas kusii daray “Waxaan shacabka Soomaaliyeed ugu baaqayaa ka qayb-qaadashada taakulaynta ciidanka naftood hurayaasha ah ee la diriraya cadowga argagixisada ah ee dalkeenna ku soo duulay.”
Guddiga taakulaynta iyo daryeelka dhaawacyada ciidanka Puntland ayaa sameeyay “sanduuqa taakulaynta ciidanka Puntland”, iyagoo guddiga soo bandhigay akoonada taakuulada ciidanka lagu garab istaagayo loogu shubayo.
Guddiag taakulaynta ayaa ballan-qaaday inay si daah-furan bulshada ula wadaagi doonaan taakuladda ciidanka lasoo gaarsiiyo, taas oo bulshada ugu muujinayaan in gacan aamin ah ku dhaceyso dhaqaalaha loogu tala-galay ciidamada dagaalka ku jira.
