Madaxweynaha Soomaaliya Maxamed Cabdullaahi Farmaajo ayaa xalay soo saaray qoraal uu ku eedeenayo Ra’isul Wasaaraha xukuumada Soomaaliya kuna sheegayo Rooble in uu ku fashilmay hogaaminta doorashada.
Qoraalkan kasoo baxay Madaxweyne Farmaajo ayaa lagu baahiyay baraha bulshada ay ku leedahay Villa Soomaaliya, waxaana warkaasi aan lasoo dhigin baraha bulshada iyo websetyada warbaahinta dowlada sida Telefishinka Qaranka.
Wararka aan helnay ayaa sheegaya in wasaarada warfaafinta iska diiday in warkaasi Farmaajo kasoo baxay laga baahiyo warbaahinta dowlada, waxa ayna warkaasi u aragtay mid wax u dhimaya xukuumada.
Dagaalka siyaasadeed ee u dhaxeeya Madaxweyne Farmaajo iyo Ra’isul Wasaare Rooble ayaana mar kale soo laabtay, waxaana horey warbaahinta dowlada u diiday wararka Farmaajo ee xasarada abuurayay xiligii khilaafka kala dhaxeeyay Rooble.
