Somaliland oo weli ku adkeysaneysa heshiiskii is-afgarad ee 1-dii Janaayo ee sanadkaan ay la gaartay Ethiopia, ayaa qaaday tallaabo cusub oo u muuqata in maamulka uu ku muujinayo in weli uusan waxba iska bedelin heshiiskaasi, xilli ay ka horyimaadeen DF iyo caalamkaba.
Mucaaradka ayaa Soo dhaweeyey heshiiskii is-afgarad ee dhex maray Somaliland iyo Ethiopia kadib kulan ay labada xisbi mucaarad la qaateen madaxda guddiga farsamo ee heshiiska labada dhinac.
Kulanka guddigu la qaateen hoggaamiyayaasha axsaabta mucaaridka ah ee Ucid iyo Waddani ayaa lagu sheegay in ujeedkiisu ahaa mid isxog-waraysi iyo talo urursi la xiriira isfahamka dhex-maray Somaliland iyo Ethiopia oo ay guddidani ku hawlan tahay lafa-gurkiisa.
Guddiga ayaa waxay hoggaanka sare ee asxaabta mucaaradka uga warbixiyeen hawlaha ay guddi ahaan gacanta ku hayaan iyo hirgelinta hawlaha ay u xil-saaran yihiin, ayada oo hoggaanka labada xisbi ay aragtiyo iyo tallooyin la xiriira heshiiska la wadaageen guddiga.
Guddigan ayaa horey u booqday dhul badeedka loo asteeyay Ethiopia oo ku yaalla degmada Lughaya, halkaasi oo ay ka sameeyeen indho-indhayn iyo xog-ururin. Sidoo kale waxay la kulmeen odayaasha dhaqanka iyo qaybo ka mid ah bulshada deegaankaasi, xilli ay reer Lughaya meel adag iska taageen damaca gurracan ee Ethiopia iyo heshiiskii 1-dii Janaayo ee sanadkaan.
Warbaahinta Bloomberg ee Mareykanka ayaa illo-wareedyo kasoo xigatay in wada-hadallo dhowaan ka dhacay Nairobi oo uu la yeeshay madaxweynaha Kenya William Ruto, ra’iisul wasaaraha Itoobiya Abiy Ahmed uu ku muujiyey inuu diyaar u yahay “inuu dib uga laabto” qeybaha muranka dhaliyey ee heshiiska, si uu soo celiyo xiriirka Soomaaliya.
Si kastaba, Soomaaliya ayaa ku adkeysaneysa in aysan marna wada-hadal toos ah la geli doonin Ethiopia, illaa Addis-Ababa ay ka laabato heshiiska sharci-darrada ah ee ay la gashay Somaliland, waana midda la rumeysan inay soo dadajisay in Ethiopia ay ka fikirto ka laabashada qeybo kamid ah heshiiskaasi.
