Wasaaradda Arrinaha Gudaha Soomaaliya oo goordhow soo saartay war saxaafadeed ayaa sheegtay in Axmed Madoobe ka dhamaatay mudadii xil heynta kuna ekeyd bishii August ee sanadka hore, islamarkaana uusan qaban karin doorasho dad-ban oo la ogyahay in uu isaga kusoo baxayo.
Dowladda Soomaaliya waxay Axmed Madoobe uga digtay in uu doorasho qabto, kala qeybin iyo qalalaaso ku yimaada wadajirka iyo daganaanshaha Shacabka waxayna sheegtay in ay qaadi doonto Tallaabo adag oo taas ka dhan ah.
Dowladdu, waxay cadeysay in aan doorasho la qaban karin oo aan ogeyn dowladda dhexe, islamarkaana aheyna doorasho qof iyo cod ah, iyadoo hogaamiyaha Jubbaland ku eedeysay in uu ka baxay heshiishyadii Madasha GWQ iyo heshiiskii 2019-kii uu la galay Saamileydii Siyaasadda Jubbaland oo dhigayay in uusan mar dambe Axmed Madoobe Murashax noqon.
