Wararka naga soo gaaraya gobolka Sanaag ayaa sheegaya in maanta xaalad daganaasho ah laga dareemayo magaalada Ceerigaabo oo maalmihii lasoo dhaafay ay ka socdeen shaqaaqooyin u dhexeeya ciidanka Somaliland iyo maleeshiyaad hubeysan oo ku dagaalamay magaaladaasi.
Gudoomiyaha Gobolka Sanaag ee Somaliland Axmed Cabdi Muuse oo u warramay Telefishinka Universal ayaa xaqiijiyay in dagaalladii ka dhacay halkaasi ay ku dhinteen dad gaaraya illaa 7 qof, balse dadaallo ay sameeyeen ay ku guuleysteen inay la dajiyo xaaladda degmada.
Axmed Cabdi Muuse ayaa sidoo kale sheegay in shaqaaqada ay sababtay beelo dagaallamay, isla markaana aysan jirin cid kusoo duushay magaalada Ceerigaabo, sida uu hadalka u dhigay.
“Waxaan ognahay inay reero shaqaaqo dhex-martay cid kale oo Ceerigaabo kusoo duushay ma ogin reeraha ay shaqaaqadu dhex-maray meel fiican ayaa wada-hadalkooda uu marayaa manta iyo jawiga nabadda Ceerigaabo waa idinkaa arka” ayuu yiri guddoomiyuhu.
Sidoo kale wuxuu sii raaciyay “Qof weliba nabad ayuu ku joogaa, nabad ayuuna ku soconayaa waxaan uga mahad-naqeynaa bulshada sida wanaagsan ee ay ula shaqeynayaan ciidanka qaranka”.
Waxaa kale oo uu hoosta ka xariiqay in haatan arrinta iyo xalkeeda ay ku jiraan odayaasha dhaqanka si xal loo gaaro, magaaladana ay dagan tahay.
“Waxaan u mahad-naqeynaa waayeelka wada-hadalka ku jira ee arrinta daadi’inaya Ceerigaabo waa nabad-gelyo, dhowr Ceerigaab ma jirto dadka xumaanta sheegayo waa iyaga” ayuu sii raaciyay.
Ceerigaabo iyo agagaarkeeda ayaa laga dareemay xaalad kacsanaan ah oo isku rogtay inay is eedeeyaan Somaliland iyo SSC-Khaatumo oo horay ugu dagaalamay gobolka Sool.
