War kasoo baxay Hay’adda Sirdoonka Soomaaliya ayaa faah faahin looga bixiyay duqeymo saacadihii lasoo dhaafay ka dhacay degaanka Sabiid iyo Caanoole oo lagu bartilmaamaysaday horjoogayaal iyo dagaalamayaal ka tirsan Kooxda Al shabaab.

War saxaafadeedka ayaa lagu sheegay in Ciidanka Hay’adda Sirdoonka iyo Nabadsugidda Qaranka ee NISA, oo howlgallo duqeyn ah oo ilaa lix gaaraya ka fuliyay nawaaxiga deegaanka Sabiid iyo Caanoole ee Gobolka Shabeellaha Hoose, ay halkaas ku dileen 82 xubnood oo isugu jiray Horjoogeyaal iyo Maleeshiyaadka Al shabaab, halka 19 kalana dhaawac culus lagu gaarsiiyay duqeynta.

Degaankaasi 24kii saac ee lasoo dhaafay waxaa dagaalo xoogan uu ku dhexmaray Al shabaab iyo ciidamada Dowladda oo markii dambe Kooxda lagu duqeeyay goobo ay degaankaasi kaga dhuumaleysanayeen.

War saxafaadeedka NISA ayaa lagu xusay in Howlgalladan lagu naafeeyay argagixisada oo ilaa iyo xalay soo gaaray uu yimid kaddib markii Ciidanka Hay’adda Sirdoonka ay heleen xogta koox Al shabaab ah oo isku dayay in ay carqaladeeyaan amniga deegaanka Sabiid iyo Caanoole.

“Hay’adda NISA, waxa ay markale dadka rayidka ah ku wargalineysaa in ay ka fogaadaan goobaha ay ku dhuumaaleysanayaan Al shabaab ee bartilmaameedka u ah Ciidanka Qaranka” ayaa lagu soo gaba gabeeyay warka kasoo baxay Sirdoonka ee lagu faah faahiyay duqeymihii ka dhacay Sabiid iyo Caanoole.