Dadaalladii nabadeynta iyo dib-u-heshiisiinta ahaa ee maalmihii la soo dhaafay ka socday gobalka Hiiraan ayaa u muuqda kuwa laga gaaray natiijo wax-ku-ool ah oo ay dad badan rajo ka qabaan inay billow u noqon karto xal-u-helidda xaaladaha amni iyo kuwa siyaasadeed ee gobalka.
Sida aan ka soo xigannay dad xogogaal ah, horumarka hadda laga gaaray arrinta gobalka Hiiraan ayaa loo sababaynayaa kaalinta hoggaamineed ee ay qaateen mas’uuliyiinta ka soo jeedda gobalkaas oo uu ugu horreeyo Taliyaha Nabadsugidda Qaranka C/llaahi Sanbalooshe.
Taliyaha oo mudo 10 maalmood ah ku maqanaa Hiiraan ayaa maanta soo gabagabeeyay safarkiisa, waxaana arrimaha uu xalka ka gaaray ka mid ahaa:
1. In dib xeyndaabka dawladnimada loogu soo celiyo garabka Hiiran State oo ku sugnaa Feerfeer Itoobiya oo uu hoggaaminayay Abdullahi Ganey
2. In si nabad ah gacanta dawladda loogu soo celiyo xaruntii gobalka Hiiraan, ka dib markii la qanciyay garabka Hiiran state ee uu horkacayay Colow oo ku sugnay Xarunta.
3. In dib loo abaabulo, safafka halgamayaashii deegaanka ee Macawiisleyda oo la mideeyay cududdooda si mar labaad loo dardargaliyo dagaalka ka dhanka ah AS,
4. in la xaliyay xiisaddii ka dhalatay Askartii lagu laayay Ceelbaraf iyo in xalkaas ay si weyn uga baxeen Duubabka Dhaqanka Mudullood uu hoggaaminayay Imaam Daahir Imaam Maxamuud.
5. In la qaaday isbaaroyinkii yaalay Beledweyne oo sababta u ahaa sicirbarar dhanka maciishadda ah oo ay ku dhibbanaayeen dadka deegaanka.
