Wararka naga soo gaaraya gobolka waqooyi bari Kenya ayaa sheegaya in koox hubeysan oo loo maleynayo inay ka tirsan yihiin kooxda Al-Shabaab ay galinkii dambe ee shalay afduub u geysteen labo qof oo saarnaa gaari marayay inta u dhaxeysa Wargaduud iyo Ceelwaaq, oo ka tirsan ismaamulka Mandheera.

Mid ka mid ah dadka la afduubtay ayaa ahaa farsamayaqaan u shaqeynayay shirkad isgaarsiineed, halka kan kalena uu ahaa darawal. Wararka hordhaca ah ayaa tilmaamaya in darawalkii ay kooxdu sii daayeen, iyadoo farsamayaqaan kii iyo gaarigii uu watay ay haatan ku jiraan gacanta kooxdii afduubka geysatay.

Ilo-wareedyo deegaanka ah iyo mas’uuliyiin ammaanka ku sugan ayaa sheegaya in ay aad u suuragal tahay in dableyda afduubka fulisay ay ka tirsan yihiin kooxda Al-Shabaab, kuwaas oo marar badan weerarro iyo afduubyo ka gaystay xuduudda Soomaaliya iyo Kenya, gaar ahaan gobolka Mandheera.

Waxaa la tuhunsan yahay in ragga afduubka geystay ay dhinaca Soomaaliya ula gudbeen ninka farsamayaqaanka ah, taas oo sii adkeyneysa dadaallada lagu doonayo in lagu soo badbaadiyo.

Laamaha ammaanka ee gobolka Mandheera iyo ciidamada Kenya ayaa bilaabay baaritaanno iyo howlgallo la xiriira dhacdadan, iyagoo la kaashanaya hay’adaha ammaanka ee Soomaaliya si loo helo xog dheeraad ah oo ku saabsan halka la geeyay qofka la afduubtay.

Taliska booliiska gobolka ayaa sheegay inay ka go’an tahay inay dib u helaan shaqsiga la qafaashay, ayna la shaqeynayaan dowladda federaalka Soomaaliya iyo hay’adaha amniga ee caalamiga ah.

Dhacdadan ayaa cabsi ku abuurtay dadka deegaanka iyo shirkadaha isgaarsiinta ee ka howlgala xuduudda labada dal. Waxaa sidoo kale sare u kacay baaqyada la xiriira in la xoojiyo amniga, si looga hortago falal noocan oo kale ah oo saameynaya shaqaalaha rayidka ah iyo adeegyada muhiimka ah.

Afduubkan ayaa markale iftiiminaya halista sii kordheysa ee ay kooxaha hubeysan ku hayaan deegaannada xuduudka ah, gaar ahaan marka ay beegsadaan shaqaalaha rayidka ah iyo kaabeyaasha adeegyada.