Hoggaamiyaha dibadjooga ah ee Belarus Svetlana Tikhanovskaya ayaa ka digaysa halis ka imaada tilaabada uu Ruushku hub nukliyeer ah ku siinayo dalal aan xeebta laheyn ee bariga Yurub ku yaal.
Ninka dalkan hadda xukuma, Alexander Lukashenko ayaa horey u xaqiijiyay in qeybtii ugu horreysay ee kantaalo iyo bombooyin nukliyeer ah oo ka yimid Moscow inay soo gaareen Belarus. Wax yar Kadib hadalkaas, hoggaamiyaha dibadjooga ah ee Belarus Svetlana ayaa ka digtay khatarta ka dhalan karta in hubka nukliyeerka ee Ruushka loo gacangeliyo ‘keli-taliye waalan’.
Svetlana oo ku sugan magaalada Warsaw ee caasimadda Poland oo la hadashay BBC waxa ay ku eedeeysay madaxda reer galbeedka in ay ka aamusan yihiin hubka nukliyeerka Ruushka ee dibada dalkaas loo daadgureenayo markii ugu horreysay kadib burburkii Midowga Soofiyeeti sanadkii 1991.
Madaxweynaha keli-taliska ah ee Belarus Alexander Lukashenko ayaa sheegay inay heleen hubkaas xilli uu la hadlayay telefishinka dowladda Ruushka. Inta uu wareysigaas socday waxaa ka dhex muuqanayay gawaari ciidan iyo qalab militari. Waxaa uu madaxweynaha Belarus sheegay inay heleen hubkaas kahor xilliga ay filanayeen. Madaxweynaha ayaa ku jawaabay ‘Mar qura ma aynan wada helin hubka, laakiin si isxigxigta ayaa u helnay’, markii uu weriyaha telefishinka uu weydiiyay faahfaahin. Lukashenko ayaa loo arkaa in uu yahay isbaheysi muhiim u ah Ruushka, iyada oo ay Belarus kaalin weyn ku leedahay dagaalka Putin ee ka dhanka ah Ukraine.
