Guddoomiyaha gobolka Mudug ee Puntland, Faysal Sheikh Cali (Jifojabsade), ayaa ku eedeeyay dowladda Federaalka Soomaaliya inay colaad ka dhex abuurayso Puntland iyo Galmudug, isagoo sabab uga dhigay diiwaan gelinta ay hay’adda NIRA ka waddo magaalada Gaalkacyo.
Guddoomiyaha ayaa xusay in mar kasta oo madaxweyne Xasan Sheikh Maxamuud uu xafiiska yimaado, uu huriyo colaad ka dhex dhacda maamulada Puntland iyo Galmudug. isagoo sheegay haatan inay muuqato in mar kale dowladda Federaalku isku dayayso colaaddaas.
Guddoomiyaha Mudug wuxuu sidoo kale sheegay in hay’adda NIRA ay degmooyin ka tirsan Puntland ku dartay Galmudug, taasoo uu ku tilmaamay isku day lagu qalqal gelinayo bulshada, iyo in la abuuro xasillooni darro.
Wuxuu shacabka Puntland uga digay inay iska diiwaan geliyaan aqoonsiga NIRA, isagoo sheegay in Puntland iyo Dowladda Federaalka aanay lahayn wax heshiis oo ku saabsan diiwaan galinta aqoonsiga qaranka.
Si kastaba ha ahaatee, Foom ay leedahay hay’adda NIRA ayaa dhawaan kasoo muuqday baraha bulshada kaasoo degmooyinka Jarriiban iyo Galdogob ee gobolka Mudug ku darayay degaanada Galmudug.
Arrintaan oo ay ka horyimaadeen labada degmo ayaa xiisad ka dhex abuurtay labada maamul, iyagoo hawada isku mariyay hadalo xiisado colaadeed kicin kara.
