Maamulka degmada Walaweyn ee gobolka Shabeellada Hoose ayaa ka warbixiyey kiiska nin xaaskiisii hore oo afar carruur ah heysatay dilay oo isna la toogtay markii uu dagaalamay.
Ninka ayaa isku dayey inuu baxsado, ciidamada booliska degmada Walaweyn iyo ehelkii gabadha la dilay ayaa raacdeystay, wuxuuna diiday inuu is dhiibo oo waa dagaalamay.
Maamulka degmada ayaa sheegay in ninkii la toogtay markii uu dagaalamay, isagoo aan geysan khasaare kale, waxaana la isla aasay galabta meydkii gabadha iyo ninkii dilay, oo isna la toogtay markuu dagaalamay.
Maamulka degmada Walaweyn ayaa ka hadlay arrintaan naxdinta leh, waxayna sheegeen in ninkaas in la dilo aan lagu talo gelin, balse uu ku dhintay is-rasaaseyntii dhex martay isaga iyo ciidankii lagu amray inay soo qabtaan.
Ismaaciil Gacmadheere oo guddoomiye ku xigeenka arrimaha bulshada ka ah degmada Walaweyn ayaa sheegay in ninkaas lagu dilay meel duur ah isaga oo baxsad ah, wuxuuna ciidamada amniga ku bogaadiyey dadaalka ay sameeyeen.
