Madaxweynaha Mareykanka, Donald Trump, ayaa Sabtidii sheegay in ay dhici karto in khasaare uu soo gaaro ciidamada Mareykanka, kadib markii uu ku dhawaaqay in Mareykanku bilaabay “howlgallo dagaal oo waaweyn” oo ka dhan ah dalka Iiraan.
Trump ayaa sheegay in weerarradaasi lagu bartilmaameedsanayo burburinta gantaallada Iiraan iyo wiiqidda awoodda ciidankeeda badda. Tallaabadan ayaa imanaysa kadib digniino isdaba joog ah oo ka yimid Mareykanka iyo Israa’iil, kuwaas oo uga digay Iiraan in weerarro kale lagu qaadi doono haddii ay sii waddo barnaamijyadeeda nukliyeerka iyo gantaallada ballistic-ga.
Wargeyska Reuters ee ka faallooda arrimaha Khaliijka ayaa sidoo kale sheegay in xiisadda gobolka ay sare u kacday, iyadoo isha lagu hayo saameynta ay ku yeelan karto amniga, tamarta iyo dhaqaalaha gobolka.
Madaxweyne Trump ayaa muuqaal uu ku baahiyay bartiisa Truth Social ku sheegay in maamulkiisu qaaday dhammaan tallaabooyinka suurtagalka ah si loo yareeyo khatarta soo gaari karta ciidamada Mareykanka ee ku sugan gobolka.
“Maamulkaygu wuxuu qaaday tallaabo kasta oo suuragal ah si loo yareeyo halista soo wajahaysa shaqaalaha iyo ciidamada Mareykanka ee gobolka. Si kastaba ha ahaatee, mana fududayn in aan sidaan u iraahdo, nidaamka Iiraan wuxuu doonayaa inuu waxyeelleeyo,” ayuu yiri Trump.
Xiisaddan cusub ayaa la filayaa inay sii huriso walaaca caalamka, gaar ahaan marka la eego ammaanka Bariga Dhexe iyo suurtagalnimada in dagaalku sii fido.
