145 muwaadiniin Soomaaliyeed ah oo ku xirnaa xabsiyada dalka Libya ayaa maanta dib loogu soo celiyay magaalada Muqdisho, kadib muddo sanad ah oo ay xabsiyada Libya ku jireen.

Muwaadiniintan, oo u badnaa dhalinyaro, ayaa sheegay inay la kulmeen dhibaatooyin kala duwan oo ay ka mid yihiin jirdil, cunto la’aan, iyo daryeel la’aan caafimaad. Sida ay sheegeen, waxay u xirnaayeen si sharci darro ah xilli ay ku sugnaayeen Libya iyagoo doonayay inay u sii gudbaan dalal kale.

Mas’uuliyiin ka tirsan dowladda Soomaaliya iyo hay’ado caalami ah ayaa ku soo dhaweeyay garoonka diyaaradaha ee Aadan Cadde, iyagoo sheegay inay la tacaalayaan sidii muwaadiniintan dib loogu dajin lahaa loona caawin lahaa.

Qaar kamid ah dhallinyarada dalka kusoo laabtay oo la hadlay warbaahinta ayaa sheegay in ay ku faraxsan yihiin inay dalka dib ugusoo laabtaan, iyagoo sheegay inay rafaad adag kala kulmeen dalka Libiya. Waxay sheegeen inay iyagu iskood u go’aansadeen inay dalka kusoo laabteen, kaddib markii qaar badan oo kamid ah saaxiibadooda ay xabsiyada ku geeriyoodeen.

Wasiir ku xigeenka Wasaarada Arrimaha Dibadda Isxaaq Maxamuud Mursal oo kamid ah masuuliyiinta garoonka kusoo dhoweeyay dhalinyaradan ayaa sheegay, Dowladda Soomaaliya inay diyaar u tahay in ay dalka dib ugu soo celiso cid walba oo duruuf adag kala kulanta tahriibka.

Wasiir Isxaaq Mursal wuxuu sheegay in dowladda Soomaaliya ay xoogga saarayso wacyi galinta dhallinyarada Soomaaliyeed, si kuwa haatan jooga looga celiyo safarka tahriibka ee halista ku ah naftooda iyo maalkooda.