Jimcihii la soo dhaafay subaxii, qoyska Reer Xuseen waxay ku baarurgeen in gabdhooda Amiiro Xuseen aysan wali hurdada ka soo kicin.
“Intaa ma aysan ku gaari jirin hurdada,” ayuu BBC da u sheegay Maxamed Xuseen Cabdi oo la dhashay Amiiro Xuseeen.
Waxay ahayd abaaro sagaalkii Subaxnimo markii hooyadeed gudaha ugu gashay, balse waxkasta waa isbadaleen markii ay dul timid gabadheeda.
Amiiro waxaa loo tagay iyadoo ku sugan sariirtii ay ku huruday, balse dhiig badan ka qubanayo, dadkii oo ay hooyadeed ugu horeysayna waxa ku dhacay argagax xooggan.
Xaalad jaahwareer ah oo daqiiqado qaadatay ka dib, waxaa qoysku Amiiro ula carareen cisbitaalka. Ma aysan garanayn waxaa ku dhacay, balse markii ay isbitaalka tageen ayay ogaadeen in xabadi ku dhacday.
“Ma qiyaasi karno saacada rasmiga ah ee xabadu ku dhacday, laakiin dhaawaca ku yaal ayaan aragnay wayna miyir daboolnayd markii an qaadanaynay,” ayuu hadalkiisa raaciyaya Maxamed.
Cisbitaalka Somali Sudanis ee magaalada Muqdisho ayaa dhaawaca la geeyey xili barqa ah oo cadceedu soo kululaatay, ehelkuna wali waxay ku jireen xaalad hubanti la,aan ah, sida uu BBC-da u sheegay Maxamed Xuseen.
Maxaa ku dhacay Amiir?
Habeenkii Khamiista ayay si nabad u seexatay Amiiro, balse sida ay qiyaaseen qoyskeedu waxaa ku dhacday xabad habow ah oo gurigeeda soo gashay.
Sida ay sheegeen dhaqaatiirtu waxay ka soo gashay isha midig, iyada oo u gudubtay qaybta dambe ee madaxa.
Dr Cabdirixmaan Axmed Muuse oo ah mid ka mida labo dhaqtar oo fulisay qaliinka lagu sameeyey Amiiro ayaa BBC-da u sheegay in dhaawaca xabadu gaarsiiyey bukaanka uu ahaa mid halis leh.
“Qiyaastii xiligii salaadda ama waqtiyada khudbada jicmaha ayaa isbitaalka Somali Sudanese naloogu keenay Amiiro Xuseen Cabdi oo qabta dhaawac, laakiin xitaa qoysku ma ogayn waxa uu dhaawacu yahay. Waxaan saarnay Scan qaybta madaxa waxaana la ogaaday in dhaawacu yahay xabad ku dhacday qaybta hore ee wajiga dhinaca midig ee isha una sii gudubtay qaybta danbe ee madaxa”ayuu BBc da u sheegay Dr. Cabdirixmaan
Isagoo ka hadlayey xaalada dhaawaca ayuu sheegay in markiiba la galiyey qaybta xaalada degdega ah, maadaama ay miyir daboolnayd markii danbana loo gudbiyey qaybta qalliinka.
Qaliin ay fuliyeen labo dhaqtar oo qaatay ku dhawaad saddex sacadood ayaa suura galiyey in lagu guulaysto in xabada laga soo saaro qaybta dambe ee madaxa Amiiro.
Dr.Cabdirixmaan wuxuu BBC-da u sheegay in xabada ku dhacday gabadhan yar ay dhaawac xun gaarsiisay labo qaybood oo kamida madaxeeda.
“ Madaxa qofku waxaa u qaybsamaa qaybo badan gaar ahaan qaybta hore ee maxkaska, dhakada qaybta kore iyo jeegada oo ah qaybta dambe ee madaxa, xabadu waxay dhaawac gaarsiiyey qaybta qaabilsan dareenka iyo shaqada afarta adin ee dhanka bixid.
“Marka lugta iyo gacanta bidix ayaa dareenkeedu dafiic noqday oo aad u liitaa, sidoo kale waxay qaybta danbe xabadu fariisatay qaybta maskaxda ee maamusha araga taas oo iyana ay waxyeelo gaarsiiyey” ayuu BBC-da u sheegay Dr. Cabdiqaadir oo ah dhaqtar ku takhasusay qaliimada neerfaha maxkaxda iyo lafdhabarta oo sameeyay qalliinkaan.
Amiiro, hadda waxaa laga saray qaybtii xaalada culus iyadoo loo gudbiyey qaybta soo kabashada. Wali waxaan loo ogolaan cunada balse waxaa Dr. Cabdirixmaan sheegay in ilaa saddex bilood ay u baahan doonto xananayn gaara.
Waa kiiskii shanaad oo dad la mida kan Amiiro, oo uu diiwaan galiyey cisbitaalka Somali Sudanese mudo bilooyin ah, sida ay BBC da u sheegeen. Magaalooyinka Muqdisho iyo magaalooyin ka tirsan maamulada Puntland iyo Jubaland ayay bukanaadaasi ka kala yimaadeen. .
Maxamed Xuseen Cabdi oo qoyskiisu dhibane u yihiin xabad wiifto ah oo waliishii haleeshay ayaa ku tilmamay dhacdooyinkaas “dilaa dahsoon” oo si maalinle ah shacabka Muqdisho ula kulmaan.
“Waxan ka dalbanaynaa dowlada Soomaaliya inay wax ka qabato xabadaha ay ciidamadu kor u ridayaan ee dhiba ku ah dadka shacabka oo laga sameeyo taxadar” ayuu yiri Maxamed.
