Xildhibaan Ilhaan Cumar, oo ka tirsan Koongaraska Maraykanka, ayaa sharci-darro ku tilmaantay olole ay wadaan qaar ka mid ah xisbiga Jamhuuriga iyo ganacsadaha Elon Musk, kaasi oo lagu doonayo in lagaga masaafuriyo Maraykanka.

“Aniga iyo Elonba waxaan nahay soogalooti, waxayse u egtahay in midkeen dadaal u galay barashada shuruucda socdaalka ee waddankan. Guud ahaan, sharcigu waxa uu qof kasta siinayaa xuquuq, iyada oo aan loo eegin cida ay yihiin,” ayay tidhi Ilhaan Cumar.

Waxay sheegtay in haddii loo baahdo in qof la masaafuriyo uu marayo tallaabooyin sharci, sida in maxkamadi ay waaran u soo saarto, iyo in la maro habraacyo kale oo sharci ah. Balse anay suuragalayn in la iska abuuro xaalad cabsi-gelin ah.

Ololaha ay Jamhuuriyiintu ku doonayaan in Ilhaan Soomaaliya dib loogu celiyo ayaa sii xoogaystay, kaddib markii xildhibaan lagu magacaabo Brandon Gill, oo laga soo doorto gobolka Texas, uu shacabka ka codsaday inay saxeexaan codsi lagu masaafurinayo Ilhaan.

Dagaalka Ilhaan Cumar iyo Madaxweyne Trump ayaa billowday muddo-xileedkiisii hore, isaga oo marar badan nacayb gaar ah u muujiyay Ilhaan, xitaa wuxuu aflagaadeeyay Soomaaliya, oo uu ku tilmaamay meel aan dowlad lahayn oo qasan Ilhaan awgeed.

Jamhuuriyiintu waxay Ilhaan Cumar ku eedeynayaan in kursiga ay ku fadhido ay ugu adeegto danaha Soomaaliya.

Ilhaan Cumar, oo ah gabadhii ugu horreysay ee Soomaali ah, madow ah, Muslim ah, ee ku biirta Koongaraska Maraykanka, ayaa wajahaysa cadaadis kaga imanaya kooxda Trump, waxayna weerarka lagu hayo ku tilmaantay mid cunsuriyad salka ku haya.