Warsaxaafadeed ay soo saartay hay’adda aqoonsiga iyo diiwaangelinta dowladda Federaalka Soomaaliya ee NIRA ayaa lagu beeniyay eedeymo loo jeediyay hay’adda oo la xariiray in degmooyin ka tirsan Puntland ay raacisay Galmudug.

Hay’adda NIRA ayaa warsaxafadeedkeeda ku cadeysay in foomka baraha bulshada lagu faafiyay ee sheegaya in degmooyinka Galdogob iyo Jariiban ka tirsan yihiin Galmudug inuu yahay mid been abuur ah oo aan hay’addu wax shaqo ah ku laheyn, islamarkaana foomka saxda ah ee hay’addu uu yahay mid dhex yaala boggaga hay’addu leedahay.

“NIRA waxay caddaynaysaa in foomka Baraha Bulshada lagu faafiyay uu yahay mid been-abuur ah, foomka rasmiga ah ee Hay’adda waxaa laga heli karaa websaydkeeda iyo xarumaheeda kala duwan.Hay’addu waxay sidoo kale u xaqiijinaysaa shacabka Soomaaliyeed in aanu jirin wax go’aan ah oo ay NIRA gaartay kaas oo deegaanno ka tirsan Dowlad Goboleedka Puntland lagu hoos-geynayo Galmudug” ayaa lagu yiri Warsaxafadeedka kasoo baxay hay’adda NIRA.

Warsaxafadeedkaan kasoo baxay NIRA ayaa kusoo aadaya, iyadoo maalmahii lasoo dhaafay baraha bulshada si weyn ay u hareeyeen doodo la xariira in hay’adda NIRA deegaano ka tirsan Puntland ay raacisay Galmudug.

Ugu dambeyntii hay’adda NIRA waxay sidoo kale qoraalkeeda ku xustay iney u hoggaansan tahay xaduudaha Dastuuriga ah iyo nidaamka Fedaraalka, islamarkaana ay ka go’an tahay in adeegyada aas aasiga ah si cadaalad ah ku gaarsiiso guud ahaan shacabka Soomaaliyeed.

Hoos ka akhriso Warsaxafadeedka NIRA oo dhameystiran:-