Guddiga sare ee hay’adda lacagta adduunka ee IMF ayaa soo gaba-gabeeyay dib-u-eegistii 1-aad ee dhaqaalaha Soomaaliya, kadib hannaankii deyn-cafinta.
Guddiga sare ee IMF ayaa Soomaaliya u fasaxay, una ogolaaday in Soomaaliya si deg-deg ah loo siiyo lacag dhan 10 milyan oo doolar, si ay ugu taageeraan siyaasadda dhaqaale ee Soomaaliya.
Go’aanka gaba-gabada ah ee guddigu soo saaray ayaa lagu fasaxay lacagtaan cusub oo taageero u ah horumarinta siyaasadda dhaqaalaha iyo qorsheyaasha dib-u-habaynta maaliyadda dalka.
Kadib, shirar isdaba joog ahaa oo ay wada qaateen madaxda dowladda Soomaaliya iyo kuwa hay’adda IMF, kulamadaas oo soo socday tan iyo December 2023-kii markii ay dowladda Soomaaliya gaartay bar dhamaadka deyn cafinta, ayay hada si rami ah ugu dhawaaqeen gudda sare ee IMF “in dowladda Soomaaliya ay ku socoto dhabbaha saxda ah ee horumarinta dhaqaalaha.”
Hay’adda IMF ayaa saadaalin wanaagsan ka bixisay hiigsiga 2024-ka halka lafilayo in uu gaaro dhaqaala Soomaaliya (GDB) oo ah 3.7 boqolkiiba, marka loo eego halkii uu taagnaa sanadkii tagay ee 2023-ka oo uu ahaa 2.8. boqolkiiba.
“Soomaaliya waxay sii waday in ay horumariso barnaamijyadeeda dib-u-habeynta Maaliyadda oo u ahaa ajande xoogan oo mudnaan gaar ah lasiiyay, sidoo kale, waxaa xooga la saaray joogteynta qorshayaasha horumarinta dakhliga iyo maamul wanaaga maaliyadda,” ayaa lagu yiri warbixinta IMF.
Taageerada $10-ka Milyan ee dollar ayey sheegtay IMF in la marin doono miisaaniyadda dowladda Soomaaliya, taasi oo ka dhigaysa wadarta guud ee taageerada maaliyadeed ee IMF ee Soomaaliya $50 milyan .
Sidoo kale waxay sheegtay hay’adda IMF in taageeradan ay waafaqsan tahay qorshaha horumarinta qaranka Soomaaliya iyo hiigsiga fog ee dowladda ee ku aaddan ilaalinta xasilloonida dhaqaalaha, xoojinta dakhliga iyo maamulka maaliyadda.
13-kii December ayey aheyd markii Soomaaliya si rasmi ah looga cafiyay guud ahaan deyntii uu caalamka ku lahaa, tan iyo markaas Soomaaliya ayaa haysatay fursad wanaagsan oo ay ku heli karto deeqo caalami ah iyo maalgashi ballaaran
