Dowladda Federaalka Soomaaliya ayaa haatan qaaday tallaabo culus oo ay uga hortageyso ololaha ay Somaliland aqoonsiga uga raadineyso dowladda Mareykanka, si gebi ahaanba meesha looga saaro qorshaha hadda socda.
Tallaabadan deg-degga ah ee ay qaaday dowladda ayaa waxaa hormuud u ah safaaradda Soomaaliya ee Washington oo bilowday qorshe ay uga hortageyso aqoonsiga Somaliland.
Safaaradda ayaa lagu soo warramayaa in ay heshiis la saxiixatay mid kamid ah shirkadaha ugu waa weyn ee ka shaqeeya u qareemidda iyo u ololaynta Maraykanka, iyadoo ujeedadu yahay in la taageero dadaalka Soomaaliya ee ka dhanka ah aqoonsiga madax bannaanida Somaliland.
Sida uu daabacay Wargeyska The Africa Report, shirkadda heshiiska lala galay oo lagu magacaabo BGR ayaa qandaraas ku qaadatay lacag dhan $600,000 muddo 12 bilood ah, si ay saamayn ugu yeelato go’aannada sharciyeed ee Maraykanka ee la xiriira arrinta aqoonsiga Somaliland.
Shirkaddan ayaa sidoo kale ka shaqeyn doonto wanaajinta cilaaqaadka dowladda federaalka kala dhexeeya maamulka cusub ee madaxweyne Donald Trump.
Wargeyska oo sidoo kale soo xigtay safaaradda Soomaaliya ayaau sheegtay in haatan uu wanaagsan yahay xiriirka u dhexeeya labada dal ee Soomaaliya iyo Mareykanka, ayna ka wada shaqeeyaan arrimo muhiim ah oo ay ugu horreyso la dagaallanka argagixisada.
“Waxaan sii wadeynaa inaan ka wada shaqeyno la dagaalanka argagixisada iyo arrimaha kale ee muhiimka ah ee amniga. Waxaan sidoo kale doonaynaa inaan ballaarinno iskaashiga dhaqaale iyo xiriirka labada dhinacba,” ayay safaaraddu u sheegtay The Africa Report.
Ololaha ay Somaliland ictiraafka uga dooneyso Mareykanka ayaa waxaa horkacaya xildhibaan ka tirsan Congress-ka Mareykanka oo la yirahdo Scott Perry, kaas oo aqalka horgeeyay xeer cusub oo u ololaynaya in Somaliland loo aqoonsado dal madax-bannaan.
Hindise sharciyeedka oo tirsigiisu yahay 10402 waxa uu hoosta ka xariiqayaa xasiloonida Somaliland ee tobanaanka sano socotay, ka go’naanta dimuqraadiyadda, iyo muhiimadda istiraatijiyadeed ee Geeska Afrika oo ah sababaha ugu muhiimsan ee aqoonsiga Maraykanka.
