Hay’adda Sirdoonka iyo Nabad Sugidda Qaranka ee NISA ayaa shaacisay inay ku raad-joogto xogta horjooge Xasan Cali Maxamed oo loo yaqaanno Xasan Afgooye, kaas oo Khawaarijta u qaabilsan dabagalka lacagaha baadda ah iyo xiriirka shirkadaha.
Hay’adda ayaa ka digeysa la macaamilka Horjooge Xasan Afgooye, kaas oo xayiraad la saaray, isla markaana toos loo helo xogta xiriirada uu sameeyo.
“NISA oo la socota aalad walba oo uu xiriirradiisa u isticmaalo, waxa ay ka digeysaa la macaamilkiisa guud iyo ka ag-dhawaanshaha goobaha uu ku sugan yahay, maaddaama horjoogahan ay Dowladda Federaalka Soomaaliya saartay xannibaad dhan kasta ah,” ayaa lagu yiri qoraalka NISA.
Hay’adda ayaa qoraalkaan bulshada uga codsatay inay u soo sheegaan hadii ay arkaan ninkaas, waxaana la shaaciyey lambarro lagala xiriiri karo Hay’adda.
“Muwaaddin haddii aad heyso xog ku saabsan horjoogahan la wadaag hay’adaha amniga oo la xiriir lambarka 199 ama WhatsApp 0770747474,” ayaa lagu yiri qoraalka NISA.
Dowladda ayaa qofkii xogtiisu guuleysato oo sabab u noqda in ninkaas la qabto u balan qaaday abaal-marin aan la shaacin waxa ay tahay.
“Haddii ay xogtaadu guuleysato waxaad heli doontaa abaal marin maqaamkeedu sarreeyo,” ayaa lagu soo gabagabeeyey qoraalkaan ka soo baxay Hay’adda NISA.
Sidoo kale waxaa la soo bandhigay sawirka Xasan Afgooye, si dadku u arkaan loona qabto ama loo dilo, maadaama uu yahay ninka dhaqaalaha ganacsatada Muqdisho u gacan geliya Al-Shabaab.
Dhowr mar ayaan baahinay xogta ninkaan halista badan oo waqtigiisa ugu badan jooga daafaha Muqdisho, waxa uu u xil-saaran yahay baadda iyo dabagalka ganacsatada Muqdisho, ganacsadihii uu heshiis cusub la gelayo wuxuu ugu yeeraa dhulka howdka ah ee duleedka Muqdisho.
