Golaha Wasiiradda Xukuumadda Fedaraalka Soomaaliya ayaa maanta kulankooda toddobaadlaha uga hadlay xaalada guud ee dalka, gaar ahaan howl-gallada culus ee kooxda Daacish ka dhanka ah, kaasi oo ka buuraha Calmiskaad ee gobolka Bari.
Golaha Wasiirrada ayaa ugu horeyntii bogaadiyey guulaha ciidamada Daraawiishta maamulka Puntland ka gaareen dagaalka, iyagoo go’aamiyey in hay’adaha dowladda ay mid walba qaadato doorkeeda waxtarka ah ee kaga aaddan garab istaagga ciidamada iyo shacabka Puntland ee dagaalka kula jira cadowga.
“Golaha Wasiirrada Xukuumadda Jamhuuriyadda Federaalka Soomaaliya ayaa bogaadiyey Ciidamada geesiyaasha ah ee Dowlad goboleedka Puntland, kuwaas oo guulo waaweyn ka gaaray jab xooggana gaarsiiyey kooxda Khawaarijta Daacisha ee ku dhuumaaleysanaysa buuraha Calmiskaad ee gobolka Bari,” ayaa lagu yiri bayaan kasoo baay shirka golaha.
Tallaabadan ayaa imaneysa xilli dowladda federaalka lagu dhaliilayay in aysan kaalin ka geysan dagaalka Daacish ee ka socda maamulka Puntland, kaasi oo haatan u gudbay wejigiisa labaad kadib guullo wax ku ool ah laga gaaray wejiga hore ee dagaalka.
Howl-galladii u dambeeyay ee ciidamada geesiyaasha ah ee Daraawiishta Puntland ay ku qaadeen buuraha Calmiskaad ee gobolka bari ku dilay ku dhowaad 60 ka tirsan Khawaarijta Daacish oo u badan ajaanib.
Sidoo kale ciidamada ayaa dagaalka ku furtay cadowgana ka furtay hub iyo saanad ciidan,
Ciidamada ayaa sidoo kale ku guuleystay xoreynta deegaanadii lagu qaaday howl-gallada ee saldhigga u ahaa Argagixisada Daacish. Deegaanka Togga-jaceel ee Buuralayda Calmiskaad ayaa kamid ah goobaha dagaalka ugu culus uu ka dhacay shalay iyo maanta, waxaana gacanta ku haya ciidamada Puntland.
