Magaalada Muqdisho, ayaa lagu wadaa in 1-da bisha May ka furmo shirka Golaga Wadatashiga Qaran, ay isugu imaanayaan Madaxda dowladda Federaalka Soomaaliya iyo madaxda dowlad goboleedyada, shirkan ayaana looga hadli doonaa arrimo xasaasi ah.
Shirka Golaha Wadatashiga Qaran , ayaa lagu casuumay madaxda dowlad goboleedyada marka laga reebo Madaxweynaha maamulka Jubbaland, oo dowladda Federaalka aysan u aqoonsaneyn Madaxweyne, kaddib doorasho muran badan dhalisay oo ka dhacday Kismaayo.
Wasiirka Amniga ee Xukuumadda Federaalka, General Cabdullaahi Ismaaciil (Fartaag), ayaa sheegay in Madaxweynaha Jubbaland Axmed Madoobe uusan kamid aheyn madaxda shirka lagu casuumay, waxa uuna xusay in dowladda Federaalka aysan ninkaasi u aqoonsaneyn in Madaxweyne yahay.
Waxa uu sheegay in Axmed Madoobe isku caleemo saaray doorasho aan sharci aheyn oon waafaqsaneyn dastuurka dalka, waxa uuna xusay in Axmed Madoobe hal shardi uga xiran tahay in uu ka qeybgalo shirka Golaha Wadatashiga , taa oo ah in uu ka laabto doorashadii sharcidarada aheyd uu kusoo baxay.
Dhinaca kale Wasiirka Amniga Soomaaliya, ayaa sheegay in dowladda qorshaha ugu jirto in doorashooyinka golaha deegaanka ay ka qabato deegaannada Jubbaland, waxa uuna caddeeyay in lix degmo oo katirsan gobolka Gedo iyo labo degmo oo katirsan Jubbada Hoose in doorashooyinka ka dhacayaan.
Wasiirka, ayaa sheegay in dowladda Soomaaliya ka go’an tahay qabashada doorashooyin ka dhaca deegaannada Jubbaland xitaa haddii ay caqabado siyaasadeed uga yimaadaan maamulka Jubbaland iyo hoggaankiisa ugu sarreeya.
Shirka Golaha Wadatashiga Qaran ee ka dhacaya magaalada Muqdisho, ayaa lasii ogyahay in aysan ka qeyb gali doonin Madaxda maamulada Puntland iyo Jubbaland, kuwaa oo horey u shaaciyay in xiriirka u jareen dowladda Federaalka Soomaaliya.
