Dowladda Federaalka Itoobiya ayaa guul wayn oo lama filaan ah ka gaartay Soomaaliya iyo Rwanda, kadib tartan ka dhacay magaalada caasimada ah ee dalkaas, kaas oo loo galay Golaha Fulinta ee Ururka Midowga Afrika.

Itoobiya ayaa heshay xubnimada Golaha Nabadda iyo Ammaanka ee Midowga Afrika (AUPSC), kadib markii loo doortay shalay oo Arbaco ahayd, intii uu socday shirkii 46-aad ee Golaha Fulinta ee Addis Ababab, kaas oo mudadeedu noqon doono 3 sano ee soo socota.

Natiijada codeynta oo la shaaciyay ayaa Itoobiya waxa ay heshay 38 cod, iyada oo sidaas ugu guuleysatay kursiga bariga Afrika, iyadoo ka sarreysa dalalka Rwanda iyo Soomaaliya oo helay hal cod iyo toban cod.

Guusha ay gaartay Itoobiya ayaa sii xoojin doonta joogitaankeeda diblomaasiyadeed ee hay’adda ugu saamaynta badan dhinaca amniga ee Qaaradda Afrika, sidoo kalana ay haatan dalkeedu ku taallo xarunta dhexe ee Ururka Midowga Afrika.

Sidoo kale, fursaddan ayaa Itoobiya waxa ay siineysaa awood kale oo  ku aaddan arrimaha nabadda iyo amniga, gaar ahaan Soomaaliya iyo geeska Afrika oo dhan, maadaama ay hanatay kursigii bariga Afrika ee Golaha Nabadda iyo Ammaanka ee Midowga Afrika.

Kursigan oo ay ugu dambeyn kusoo baxday Itoobiyay ayaa waxaa loo galay loolan adag, iyada oo Soomaaliya ay bixisay dadaallo dheeraad ah, laakiin ma helin guushii ay fileysay, waana wax dhaco mar kasta oo la galo tartan ama doorasho.

Si kastaba, Itoobiya ayaa haatan dooneyso inay sii ballaariso joogintaankeeda Soomaaliya, ayna qayb ka noqoto howlgalka cusu  ee  AUSSOM oo sanadkan ka bilowday gudaha dalka.