Dowladda federaalka Soomaaliya ayaa la sheegaya inay hakisay dhamaan duulimaadyadii rakaabka de tegi jiray gobolada dalka.
Go’aankan oo la xiriirinayo diidmada shirkadaha diyaaradaha ee inay ciidamo ka dejiyaan deegaanka Raaskambooni ee maamulka Jubbaland ayaa maanta jahwareer horleh ka abuuray garoonka diyaaradaha Aadan Cadde ee magaalada Muqdisho, maadaama ay halkaasi ku xayiran yihiin rakaab badan.
Shirkadaha diyaaradaha ayaa ka cabsi qaba in diyaaradahooda la soo rido, taas oo keentay inay diidaan qaadista ciidamada la geynayo Jubbaland. Dowladda federaalka oo arrintaas ka carootay ayaa go’aan ku gaartay in ay hakiso dhamaan duulimaadyada ay ku tagi jireen gobolada dalka.
Maamulka Jubbaland ayaa dhawaan u digay shirkadaha diyaaradaha haddii ay ciidamo kusoo daabulaan maamulkooda, iyadoo amar ku bixisay in aysan wax duulimaad ah ka soo degi karin garoonka Raaskambooni.
Ma jirto illaa hadda wax diyaarad rakaabka ah oo ka dhoofay garoonka diyaaradaha ee magaalada Muqdisho, kuwaas oo ku sii jeeda gobolada dalka, waxaana saacado badan halkaasi ku xayiran rakaab rabay inay u safraan gudaha dalka.
Dowladda federaalka Soomaaliya oo si weyn isku hayaan maamulka Axmed Madoobe ayaa ciidamo horleh ku daabuleyso deegaanada maamulka, iyadoo ku andacooneysa in ciidankan uu qeyb ka yahay dagaalka ka dhanka ah Al-Shabaab.
Dowladda ayaa sidoo kale ka fur-furid ku wada ciidamada maamulka Jubbaland, taas oo keentay in qaarkood ay kasoo goostaan Axmed Madoobe, kuwaasi oo si rasmi ah ciidanka xoogga dalka loogu diiwaan-geliyay.
