Ra’iisul Wasaaraha Anthony Albanese iyo dhiggiisa Canada Mark Carney ayaa ku baaqay in la dejiyo xiisadda sii kordheysa ee Bariga Dhexe, iyagoo carrabka ku adkeeyay in xabbad-joojin dhab ah aysan suuragal noqon karin haddii aan la hor istaagin Iran inay samaysato hub nukliyeer ah.

Albanese ayaa hadalkan ka sheegay shir jaraa’id oo uu la qabtay Carney intii uu booqasho ku joogay Canberra. Wuxuu sheegay in beesha caalamka ay si weyn u doonayso in la yareeyo xiisadda iyo colaadda ka taagan gobolka.

“Adduunku wuxuu rabaa in la arko dejinta xiisadda,” ayuu yiri Albanese. “Waxaan aragnaa dalal ka tirsan Gacanka oo aan colaadda ku lug lahayn oo la weeraray, oo ay ku jiraan weerarro lagu qaaday goobaha rayidka iyo meelaha dalxiiska. Sidaas darteed, waxaa muhiim ah in la gaaro ujeeddooyinka la dejiyay ee lagu joojinayo khataraha sii kordhaya.”

Dhankiisa, Carney ayaa ku celiyay baaqa ku aaddan in la dejiyo colaadda, isagoo sheegay in xaaladda hadda jirta ay muujinayso fiditaanka dagaalka oo sii ballaaranaya.

“Hadda waxa socda fiditaanka colaadda, taasna si cad ayaan u aqoonsannahay,” ayuu yiri. “Ka hor inta aan laga hadlin xabbad-joojin, waa in si degdeg ah loo joojiyaa beegsiga rayidka iyo kaabayaasha rayidka. Kuwani waa shuruudo lama huraan ah oo ay tahay in la buuxiyo.”

Labada hoggaamiye ayaa sidoo kale muujiyay taageeradooda weerarrada ay Israel iyo United States ku qaadeen Iran, kuwaas oo bilaabmay Sabtidii, iyagoo ku tilmaamay tallaabooyin la xiriira amniga gobolka iyo ka hortagga khataraha nukliyeerka.

Markii la weydiiyay suurtagalnimada in Canada ay si toos ah ugu biirto weerarrada ka dhanka ah Iiraan, Carney wuxuu sheegay inuusan gebi ahaanba meesha ka saari karin arrintaas, balse uu kala saaray ficillada weerarka iyo kuwa difaaca.

Mar walba waan difaaci doonnaa muwaadiniinta Canada,” ayuu yiri. “Sidoo kale, mar walba waan garab istaagi doonnaa oo difaaci doonnaa xulafadeenna marka naloo baahdo.”