Siddeed askari oo Israa’iil ah ayaa lagu dilay koonfurta Gaza Sabtidii sida ay sheegeen ciidamada Israa’iil waana mid ka mid ah shilalka ugu dhimashada badnaa ee ay ciidamadoodala kulmaan tan iyo 7-dii Oktoobar.
Israel waxay sheegtay in dhacdadani ay wali dib u eegis ku socoto balse natiijooyinka hordhaca ah ayaa sheegaya in gaari gaashaaman oo ay saarnaayeen askar qayb ka ahaa kolonyo uu qarax haleelay abaaro 5.15 subaxnimo wakhtiga maxaliga ah intii uu socday hawlgal ka socday qaybta waqooyi galbeed ee Tal al -Suldaan.
“Sida aan xogta ku hayno xilligaan mid ka mid ah baabuurta Injineerada ee kolonyada ayaa ku lug lahaa qarax ka dhashay walxaha qarxa oo goobta lagu aasay ama ka dhashay gantaallada lidka taangiyada,” ayuu yiri Afhayeenka ciidamada Israel Daniel Hagari.
War ay horay u soo saartay Israel ayaa lagu sheegay in laga yaabo in qaraxa hore uu ka dhashay markii walxaha qarxa ee gaariga saarnaa ay la qaraxday.
“Qiimeynta hadda waxay tahay in gaariga gaashaaman ee ‘Nemera’ uu haleelay qarax miinada dhinaceeda ah. Intaa waxaa dheer, gaariga waxaa saarnaa qalab ay ku jiraan walxaha qarxa. Qaraxa ayaa ahaa mid muhiim ah waxaana laga yaabaa in uu ka dhashay walxaha qarxa ee gaariga saarnaa. Waxaas oo dhan ma ahan inay dhacaan sidaas darteed dhacdada waa la baarayaa,” ayay tiri Israel.
Milateriga Israa’iil ayaa intaas ku daray in khasaaruhu uu aad u badan yahay oo ay adkeyd in la ogaado oo la helo maydadka dadka la dilay.
“Maanta waxaan helnay xusuus kale oo xanuun badan oo ku saabsan qiimaha dagaalka iyo in dagaalyahannada geesiyaasha ah iyo geesiyaasha ay diyaar u yihiin inay naftooda u huraan dawladda Israa’iil, Dhammaan muwaadiniinta Israa’iil, qalbiyadeenna iyo fikirradeenna waxay la jiraan qoysaska waqtigan adag,” ayuu yiri Hagari.
Guutada Al Qassam, garabka militariga ee Xamaas, ayaa sheegay in “ay fuliyeen weerarro gaadmo ah oo lala beegsaday baabuurta cadawga” ee ka howlgala Tal al-Sultan, oo ku taal galbeedka magaalada koonfureed ee Rafah.
Kooxda ayaa sheegtay in ay beegsadeen cagaf-cagaf milatari, kadibna uu dab qabsaday, taasoo sababtay dhimasho iyo dhaawac soo gaartay askartii la socotay. Markii ciidamada gurmadka ay gaareen, kooxda dableyda ah ayaa ku dhufatay gaari nooca gaashaaman, halkaasoo ay ku dileen askartii.
Israa’iil waxay sheegtay in mid ka mid ah askarta dhintay uu ahaa Kabtan Wassem Mahmoud, oo ahaa taliye ku xigeenka Guutada Injineerinka. Toddobada magac ee kale ayaan weli la shaacin.
