Maxkamadda Gobolka Banaadir ayaa mar kale maanta u fariisatay kiiska musuq maasuqii loo heystay agaasimayaashii hore ee hey’adda Socdaalka iyo Jinsiyadda iyo wasaaradda maaliyadda Soomaaliya, waxaana maxkamadda laga hor sheegay in wax dembi ah lagu waayey agaasimihii canshuuraha beriga ee wasaaradda maaliyadda XFS Muxudiin Xasan Juris Saabey.
Maanta, masuul ka socda xafiiska Hantidhowrka guud ee qaranka, sidoo kalena metelayey xafiiska xeer ilaaliyaha guud ee qaranka ayaa sheegay in wax cadeyn ah oo muujinaya in Agaasimhii canshuuraha beriga Muxudiin Saabey uu xaday xoolo dadweyne ay waayeen.
Sidoo kale sarkaalka ka socday Hantidhowr ayaa sheegay in Saabey Akoonkiisa gaarka ah lacagtii ugu badneed ee martay ay aheyd lix kun, isla markaana ay hadda ku heystaan oo kaliya dayacaad masuuliyadiisa ah, maadaama rag isaga ka hooseeyey oo ka shaqeynayey waaxdaas loo maleynayo inay lacago lunsadeen.
Muxudiin Saabey waxaa xafiiskiisa laga soo helay abaal-marino iyo shahaadooyin ay guddoonsiiyeen masuuliyiinta dowladda, kuwaas oo shaqadii adkeed ee aruurunta daqliga dowladda u uku muteystay, maadaama uu ka soo bilaabay meel eber ah.
Dowladda federaalka, gaar ahaan xafiisyada xeer ilaalinta iyo hantidhowrka ayaa soo jeedinaya eedeymahaan, kuwaas oo sheegay inay sameeyeen baaritaano culus, dhamaan agaasimayaasha eedeysan ayaa hadda dalka ka maqan, balse cadwadooda ayaa ka furan maxkamadda gobolka Banaadir.
