Ku dhawaad 800,000 oo qof oo ku nool Puntland ayaa wajahaya xaalado nololeed oo aad u liidata, taasoo ka dhalatay roob la’aantii ka dhacday xilligii Deyrta 2024 iyo saadaasha roob la’aanta ee Gu’ga 2025.

Sida lagu sheegay warbixin kasoo baxday OCHA, dadkaasi waxay la ildaran yihiin biyo yari baahsan iyo cunto la’aan halis ah, taasoo si toos ah u saameysay noloshooda maalinlaha ah.

Roob la’aanta ayaa sababay in ceelashii biyo laga cabi jiray ay guraan sidoo kale beero badan oo miro dhal ah ayaa qalalay. Nabaad guurkii ka dhashay ayaa si daran u saameeyay dadka iyo xoolahooda, iyadoo magaalooyin iyo tuulooyin badan laga soo sheegay xaalado abaareed oo sii xumaanaya.

Warbixinta waxaa lagu sheegay in barakaca ka dhashay duruufahaan uu gaaray heer aad u sareeya. Qoysas badan ayaa guryahooda ka cararay, iyagoo raadinaya meel biyo iyo cunto laga heli karo. Waxaa la diiwaan geliyay barakac ballaaran, oo ay ku jiraan xoolo-dhaqato badan oo dhaqaalahoodii ku waayay abaarta.

Intaa waxaa dheer, colaadaha beelaha iyo howlgaladii ciidan ee ka dhacay qaybo ka mid ah Puntland ayaa la sheegay inay sii xumeeyeen xaaladda. In ka badan 70,000 oo qof ayaa la diiwaan galiyay inay ku barakaceen dagaaladaas, waxaana ku jira 10,000 oo qof oo ka soo barakacay degmada Qandala ee gobolka Bari.

Hay’adda Qaramada Midoobay ee u qaabilsan arrimaha bini’aadantinimada (OCHA) ayaa wadda qiimeyn degdeg ah si loo ogaado baahiyaha dadka ay saameeyeen abaarta, barakaca, iyo amni darrida. Qiimeyntan ayaa noqon doonta saldhigga loogu talagalay qorsheyaasha gargaarka ee la qorsheynayo.