In ka badan laba toddobaad ayaa ka soo wareegay doorashadii baarlamaanka Sweden, balse weli waxaa muuqata in dhismaha xukuumad cusub uu adkaanayo.

Xisbiyada mucaaradka ayaa helay 176 kursi halka xisbiyada ku jira isbahaysiga Tidö ay heleen 173 kursi Si kastaba ha ahaatee, xisbiyada mucaaradka ayaa isku khilaafsan qaabka loo dhisayo xukuumadda. Xisbiga Bidixda (Vänsterpartiet) wuxuu ku adkaysanayaa in uu helo jagooyin wasiirro, halka Xisbiga Dhexe (Centerpartiet) uu diidan yahay in uu taageero xukuumad ay Bidixdu qayb ka tahay.

Ka hor doorashadii **13 Sebtembar**, ra’yi-ururintu waxay muujinayeen in mucaaradku hoggaan ku leeyahay xisbiyada Tidö. Hase yeeshee, khilaafka u dhexeeya Xisbiga Bidixda iyo Xisbiga Dhexe ee ku saabsan ka qaybgalka xukuumadda ayaa jiray ka hor codbixinta, welina wuu taagan yahay.

Maalintii doorashada, labadaba Xisbiga Dimuqraadiga Sweden (Sverigedemokraterna) iyo Xisbiga Socialdemokraterna ayaa hoos u dhacay, halka Xisbiga Bidixda uu noqday xisbiga sameeyay kororka ugu weyn. Sida ay sheegtay wakaaladda TT, tartanka labada dhinac wuxuu ahaa mid aad isugu dhow.