Madaxweynaha la doortay ee Mareykanka Donald Trump ayaa Arbacadi magacaabay qaar ka mid ah xubnaha golahiisa wasiirrada ee soo socda, kuwaas oo dhammaantood ka mid ah siyaasiyiinti daacawadda u ahaa, hase yeeshee lagu tilmaamay kuwo aanan khibrad u laheyn jagooyinka uu u magacaabay.
Tallaabadaas ayaa ka yaabsatay qaar ka mid ah xulufadiisa midigta, iyada oo ay dadka lafa gura siyaasadda Mareyka ay ku tilmaameen sida ay dhab uga tahay Trump ballan qaadkiisii ahaa in uu dib u qaabeyn doono hey’adaha dowladda federaalka.
Trump ayaa Wasiirka Caddaaladda u magacaabay Matt Gaetz oo ah 42 jir ka tirsan Koongareeska Mareykanka lagana soo doorto degmada koowaad ee gobolka Florida. Matt oo horay u soo noqday garyaqaan ayaanan waligiis kasoo shaqeyn Waaxda Caddaaladda.
Trump wuxuu sidoo kale shalay haweeneyda lagu magacaabo Tulsi Gabbard u magacaabay Agaasimaha Hey’adda Sirdoonka Qaranka. Tulsi, oo horay u aheyd mudane Dimoqraadi ah oo ka tirsan Koongareeska balse isu baddashay Jamhuuri, ayaanan laheyn khibrar toos ah oo dhanka mukhaabaraadka Mareykanka, hase yeeshee maamuli doonta hey’addaan oo ay hoos yimaadaan ilaa 18 laamood oo ka mid ah hey’adaha sirdoonka Mareykanka.
Talaadadi, Trump ayaa wariye ka tirsan telefishanka Vox News, Pete Hegseth u magacaabay Wasiirkiisa Difaaca ee soo socda. Sidoo kale Senator Marco Rubio ayuu u magacaabay Wasiirka Arrimaha Dibadda ee Mareykanka.
Madaxweynaha la doortay ee Mareykanka Donald Trump ayaa xilka la wareegi doona 20-ka bisha January ee sannadka foodda nagu soo haya ee 2025-ka.
