Madaxweynaha Soomaaliya Xasan Sheekh Maxamuud oo dib ugu soo laabtay magaalada Muqdisho uu ka maqnaa muddo labo bil ah ayaa xalay xarunta madaxtooyada ee Villa Soomaaliya ku qaabilay hoggaamiyaha SSC Cabdulqaadir Aw Cali Firdhiye.
Xasan Sheekh ayaana hoggaamiyaha Khaatumo ay wehliyaan masuuliyiin katirsan dowladda oo kasoo jeeda deegaannada Khaatumo kala hadlay xaalada deegaannadaasi ,gaar ahaan magaalada Laascaanood oo bilooyin dagaallo ka socdeen.
Hoggaamiyaha SSC Khaatumo Firdhiye ayaa madaxweyne Xasan Sheekh warbixin ka siiyay xaalada deegaannada maamulka SSC , waxa uuna usoo bandhigay guulaha ay ka gaareen dagaalkii Somaliland iyo horumarada hadda ka socda deegaannada ay maamulaan.
Waxa uu hoggaamiyaha SSC u sheegay madaxweyne Xasan Sheekh in maamulkiisa ku yimid rabitaanka dadka deegaanka, waxa uuna ka codsaday madaxweynaha in dowladda taageerto maamulkooda ayna siiyaan waxa ay xaqa u leeyihiin.
