Toddobo qof oo Soomaali ah ayaa kasoo hormuuqday maxkamadda ku taal magaalada Eldoret ee dalka Kenya, iyada oo maxkamadda ay u ogolaatay dambi baarayaasha hoostaga qeybta Booliska ee ka hortagga argagixisada inay sii hayaan tuhmunayaasha Soomaalida muddo shan maalmood ah.
Eedeysanayaashan ayaa iskugu jira 4 nin iyo 3 gabdhood, waxaana magacyadooda lagu kala sheegay Cabdulqaadir Cali Xuseen, Ceyruus Maxamuud, Axmed Kooshin, Liibaan Cabdi Sugule, Naciima Yuusuf Axmed, Fartum Sugule iyo Leylo Abshir.
Go’aanka maxkamadda ayaa imanaya kadib markii taliska Booliska uu ka codsaday in loo ogolaado in eedeysanayaasha lagu sii hayo saldhigay dhexe ee Eldoret shanta maalmood ee soo socota.
Tuhmanayaasha Soomaalida ayaa la sheegay in looga shakisan yahay inay ku lug lahaayeen fal dambiyeedyo kahor imaanaya sharciga la-dagaalanka argagixisada ee lambar 30 ee 2012, sida lagu soo xigtay taliska Booliska dalkaasi.
“Eedeysanayaasha maadama aysan kasoo horjeedin codsiga sarkaalka baarista, maxkamaddan ayaa amartay in lagu hayo saldhiga Booliska Eldoret shan maalmood si ay Booliska awood ugu yeeshaan inay soo gaba-gabeeyaan baaritaankooda,” ayuu ku amray garsooraha.
Toddobada Soomaalida ah ayaa la soo qabtay dhamaantood 15-kii bishaan, kadib markii su’aalo la waydiiyayna ay badankooda awoodi waayeen inay ku hadlaan afka KIswahili iyo Ingiriis midna.
Kiiska Soomaalidan ayaa la qorsheynaya in dib loo dhageysto 24-ka bishaan April, waxayna dhacdadaan kusoo aadeysa xilli saraakiisha socdaalka Kenya ay ku sugan yihiin xuduudka Soomaaliya iyo Ethiopia ee Mooyaale, kadib markii ay soo bateen soo galooti sharci darro ah oo ka kala yimid dalalka Soomaaliya, Eritrea iyo Ethiopia.
