Ruushka ayaa ku qasbanaaday inuu qalab milatari ka soo iibsado Kuuriyada Waqooyi , iyada oo cunaqabataynta saaran aysan Moscow u suuragalinayn inay militarigeeda ay gaarsiiso hubka iyo qalabka ay u baahan yihiin si ay u joogteeyaan dagaalka Ukraine.
 Sarkaal Maraykan ah ayaa shaaca ka qaaday in Moscow ay waddo geedi socod ay malaayiin gantaalo iyo madaafiic ah kaga soo iibsanayso Pyongyang si loogu isticmaalo dagaalka Ukraine.
 Saraakiisha ayaa intaa ku daray in Ruushka uu ku qasbanaan karo inuu iibsado hub dheeri ah oo Kuuriyada Waqooyi uu ka iibsado maadaama dagaalka Ukraine uu sii daba-dheeraaday.
 In Ruushka uu hub kasoo iibsado Kuuriyada Waqooyi waa calaamad muujinaysa “gabaabsi dhanka saanadda militariga ah” ee haysato Ruushka, ayuu intaasi ku daray sarkaalka.
 Xogtan waxaa markii ugu horreysay shaaciyay wargeyska New York Times ee ka soo baxa dalka Mareykanka.
 Wasaaradda gaahsaandhiga ee Ukraine ayaa barteeda Twitter-ka ku soo qortay jawaab jees-jees ah oo ku aaddan warbixinta, iyadoo sheegtay in tani ay muujinayso in “hubka Sofiyeetka” uu yahay mid dhamaaday oo aan awood lahayn.”
 Wasaaraddu waxay sheegtay in markii Ukraine ay u weecatay hubka heerkiisu sarreeyo ee Nato, Ruushku uu u jeedsaday dhanka Kuuriyada Waqooyi – ha noqoto dhinaca “hubka, siyaasadda ama heerka nolosha.”
 Maamulka Kim Jong-un ayaa ku eedeeyay Mareykanka inuu mas’uul ka yahay iskahorimaadka, wuxuuna ku eedeeyay reer galbeedka inay wadaan “siyaasad ah inay iyagu wax walba iyaga looga dambeeya” taasi oo qiil u siisay Ruushka dagaalka.
