Warbaahinta dowladda Suuriya ayaa ku warantay in duqeymo cirka ah Israa’iil ay la beegsatay garoomada caalamiga ah ee caasimadda Suuriya ee Dimishiq iyo waqooyiga magaalada Xalab, halkaasoo uu ku dhintay hal qof.
Jidadka ay diyaaraduhu ku ordaan ayaa waxyeelo soo gaartay.
Weerarkan ayaa noqonaya kii labaad ee bishan lagu qaado garoonka diyaaradaha caalamiga ah ee Dimishiq, halka uu kii saddexaadna ka dhacay garoonka diyaaradaha ee magaalada Xalab, iyadoo ay sii kordheyso xiisadda Bariga Dhexe ee dagaalka Israel iyo Xamaas.
Warbaahinta dowladda Suuriya oo soo xiganeysa sarkaal milateri oo aan magaciisa la shaacin ayaa sheegay in garoomada diyaaradaha ay duqeeyeen militariga Israa’iil oo ka yimid badda Mediterranean-ka dhanka galbeed iyo buuraha Golan ee koonfurta Suuriya ee ay Israa’iil haysato.
Waxa ay sheegtay in hal qof oo shaqaale ah lagu dilay Dimishiq mid kalena lagu dhaawacay marka laga soo tago burbur hantiyeed.
Militariga Israa’iil wax hadal ah kama soo saarin weerarkan.
Tan iyo markii dagaalka u dhexeeya Israa’iil iyo Xamaas uu billowday 7-dii Oktoobar, Israa’iil ayaa dhowr weerar ka fulisay Suuriya oo ay ku jiraan mid ka mid ah garoonka diyaaradaha ee Dimishiq iyo laba ka mid ah garoonka diyaaradaha Xalab oo ay ka saareen adeegyadii ay u baahnaayeen.
Duulimaadyadii hore ayaa lagu hagi jiray garoon caalami ah oo ku yaal gobolka xeebta ee Latakia.
Israa’iil ayaa bartilmaansatay garoomada diyaaradaha iyo dekedaha badda ee ku yaalla qaybaha ay dowladdu gacanta ku hayso ee Suuriya, taasoo u muuqata inay isku dayday inay ka hortagto shixnadaha hubka ah ee Iiraan uga imaanaya kooxaha mayalka adag ee ay taageerto Tehran oo ay ku jirto Xisbullah ee Lubnaan.
Israa’iil ayaa sannadihii lasoo dhaafay boqolaal weerar ah ku qaaday goobo ay dowladdu ka taliso oo Suuriya ka tirsan, kuwaasoo ay ku jiraan weerarro lagu qaaday garoommada diyaaradaha ee Dimishiq iyo Xalab, balse inta badan ma qirato ama ka hadasho howlgalladaas.
