Odayaasha iyo Waxgaradka beelaha Ciise iyo Gadabuursi ayaa si wadajir ah u qabtay shir Jaraa’id oo heshiiskii uu badda ku saxiixay Muuse Biixi ay uga hadleen, sidoo kale waxay iclaamiyeen shirweyne looga arrinsanayo heshiiskii Itoobiyaanka lagu siiyey qeyb ka mid ah Badda Soomaaliya.
“Anagoo ah beelaha Ciise iyo Gadabuursi waxaan qaba doonaa shir balaaran oo aayo ka tashi ah, waqti dhow ayuu dhici doonaa ee diyaar haloo sii noqdo, waxaan ka hadli doonaa badda Soomaaliya, gaar ahaan dhulka ay degaan labadaan beelood oo la sheegay in Muuse gatay,” ayuu yiri mid ka mid ah odayaasha.
Sidoo kale odayaasha ayaa farriin u diray golaha guurtida Somaliland oo madaxweynaha ku taageersan qorshaha uu badda ku iibsanayo, iyagoo wacad ku maray in dhulkooda aysan marnaba Xabashidu u soo dhawaa doonin inta mid ka nool yahay.
Odayaasha qaar ayaa ku qeylo dhaamiyey in ninka badooda iibsaday uusan waxba u reeban, waxay si cad u sheegeen in badda Soomaaliya qeybta ay ka degan yihiin aysan iib aheyn, cid aan labada beelood aheyna aysan u soo dhawaa doonin.
Ugu dambeyntii odayaasha ayaa farriin u diray beelaha kale ee dega Somaliland, waxay ugu baaqeen inay ka midoobaan xadgudubka Muuse Biixi uu ku iibsaday badda, iyagoo wacad ku maray xitaa hadii beelaha kale ay ka aamusaan in aysan arrintaas aqbali doonin, hadii wax kasta loo sheego.
Muran culus ayaa ka dhashay heshiiskii qar iska tuurnimada ahaa ee Muuse Biixi uu 1-dii Janaayo Itoobiyaanka ugu saxiixay qeyb ka mid ah badda Soomaaliya, dowladda federaalka Soomaaliya ayaa qaaday dagaal diblomaasiyadeed oo culus, kaas oo natiijo fiican ay ka gaartay.
Horay dowladda federaalka ayaa beelaha dega dhulka uu Muuse iibsanayo ugu dhiira gelisay inay dhulkooda difaacdaan, iyadoo Madaxweyne Xasan Sheekh uu wacad ku maray in taako ka mid ah badda iyo beriga Soomaaliya meel kasta oo ay tahay aysan Itoobiya ama dal kale qaada doonin.
