Hey’adda Sirdoonka iyo Nabad sugidda Soomaaliya ee NISA ayaa shaacisay inay dibadda ka soo xirtay 14 Website oo kooxda Al-Shabaab ay ku faafi jirtay wararkooda, kuwaas oo sanad ka hor laga xiray dalka.
“Howlgalkaan oo isugu jiray uruurinta mareegaha, baaritaankooda, helidda magacyada milkiilayaasha ku diiwaangashan iyo ugu dambeyntii xiritaankooda ayaa socday bilihii lasoo dhaafay, waxaana lagu guuleystay in hawada laga saaro barahaan oo la diiwaan geliyey sanado kala duwan,” ayaa lagu yiri warka NISA.
“Websiteyadaan waxaa booqashadooda laga mamnuucay adduunka oo dhan, waxaana markii ugu horeysay oo la qaaday tallaabo noocaan oo kale ah, waxayna barahaan soo jireen muddo dheer, sida ku cad magacyadooda iyo taariikhaha la aas-aasay,” ayaa lagu yiri qoraalka NISA.
“Intii ay socotay howsha lagu ciribtirayo Website-yada Khawaarijta waxaa la helay liiska dadkii diiwaan-geliyey, kuwaas oo isticmaalay kaararka wax lagu iibsado, waxaana lala wadaagay hey’adaha amniga ee dalalka ay ku nool yihiin,” ayaa lagu yiri warkaan ka soo baxay NISA.
