Dowladda Federaalka Soomaaliya ayaa si xooggan u cambaareysay isku day ay dowladda Itoobiya sameysay si ay waftiga madaxweyne Xasan Sheekh uga hor-istaagto inuu ka qeyb-galo shirka madaxeedka Midowga Afrika ee maanta ka furmay Addis-Ababa.
“Hab-dhaqankani waxa uu ku biirayaa liiska sii kordhaya ee falalka gurracan ee ay ku kacaysay dawladda Itoobiya muddooyinkii u dambeeyay.”
Dowladda Soomaaliya ayaa sheegtay in maadaama Itoobiya ay marti-geliso xarunta Midowga Afrika, ay dowladdeeda iyo hoggaankeeda waajib ku yihiin inay si isku mid ah ula dhaqmaan dhammaan hoggaamiyayaasha Afrika.
“Anaga oo cambaareynayna ficilka aan sharciga ahayn ee Itoobiya, waxaan sidoo kale ugu baaqeynaa Midowga Afrika inay si degdeg ah u sameeyaan baaritaan lagu kalsoonaan karo oo madax-banaan oo ku saabsan falkan foosha xun iyadoo la raacayo hab-maamuuska ururka,” ayey tiri dowladda Soomaaliya.
Madaxweynaha ayaa ku eedeeyey Itoobiya “xushmad darro” inay kula dhaqaaqday shir madaxeedka midowga Afrika ee hadda ka socda Addis Ababa, isagoo sheegay in saraakiisha amniga ay isku dayeen in ay u diidaan inuu galo halka shirku ka socdo. Wuxuu sheegay in markii dambe loo ogolaaday inuu galo.
Wuxuu intaa ku daray madaxweynaha Soomaaliya “in wakhtigan ay saraakiil sare oo Somaliland ka socota ay diyaar garow halkaa ka wadaan,” si heshiiska loo dhaqan galiyo, wuxuuna sheegay in Itoobiya ay sii murjinayso xiisadda.
