Wararka naga soo gaaraya degmada Xarardheere ee gobolka Mudug ayaa sheegaya in howl-gal culus uu ka socdo deegaanka Baraag Cali-gaduud.
Ciidamada huwanta ayaa waxay howl-galkaan ku dileen Shabaab badan, illaa haddana waxaa la xaqiijinaya dhimashada toban ka tirsan maleeshiyaadka kooxda Al-Shabaab.
Xubnaha la dilay ayaa la sheegay inay qeyb ka ahaayeen maleeshiyaad lagu aruurinayey degaankaas, ayna kooxda u diyaarineysay howl-gal ka dhanka ah ciidamada.
Ciidanka howl-galka fuliyey ayaa sidoo kale gacanta ku dhigay hubkii Shabaab-ka, waxaana wali socda howl-gal ay ciidanka ku baacsanayaan xubnihii ka badbaaday howl-galkaan.
Howl-galkaan culus ayaa imanaya xilli muddooyinkii dambe ay hoos u dhaceen howl-galladii ka dhanka ahaa kooxda Al-Shabaab, marka laga tago duqeynta cirka iyo deegaano kooban.
Gulufka dagaal ee ka dhanka ah Al-Shabaab ayaa tan iyo markii uu billowday waxay kooxda ku weysay gacan ku haynta deegaano aad u badan, kuwaasi oo qaarkood ahaayeen saldhigyo muhiim u ah kooxda.
