Wasiirka wasaaradda amniga gudaha xukuumadda Soomaaliya, Mudane Maxamed Axmed Sheikh Cali (Doodishe) oo ka qayb-galay kulan dadweyne oo su’aallo lagu weydiinayay ayaa ka hadlay xaaladda magaalada Muqdisho.
Sidoo kale waxaa uu tilmaamay in qorshahaan uu hadda socdo, isla-markaana qayb qayb loo furi doono waddooyinka xiran, si ay u isticmaalaan dadweynaha Soomaaliyeed.
“Marka ka qaadaayo qayb qayb ayaa loo qaadaayaa waxaa la hubsanayaa meeshaan dhagaxa laga qaadaayo shaqadii uu dhagaxa haayay ma dhammaatay? haddii ay dhammaatay waa la qaadayaa waddadiina waa la marayaa,” ayuu yiri wasiir Doodishe.
“Waxaan rajeyneynaa dowr bilood kadib inaad magaaladan oo dhagax lahayn aad horay iyo gadaal, habeen iyo maalin aad socotaan,” ayuu hadalkiisa sii raaciyay wasiirku.
Dhanka kale, wasiirka amniga gudaha Soomaaliya oo hadalkiisa sii wata ayaa xusay in amniga magaalada Muqdisho uu haatan wanaagsan yahay, isla-markaana la fogeyn doono xeyndaabka haatan yaalla gudaha magaalada, si la’isugu furo waddooyinka oo dhan.
Maalmihii u dambeeyay ayaa waxaa Muqdisho ka jiray xaalad degnaasho ah, marka loo eego marxaladihii hore, waxaana yaraaday dilalkii, qaraxyadii iyo weeraradii ay horay uga geysan jirtay kooxda Al-Shabaab, taas oo ku timid qorshaha ay la timid dowladda dhexe.
